لاہور: (سنو نیوز) پنجاب حکومت نے جزوی لاک ڈاون میں بھی تبدیلی کرتے ہوئے 8 اضلاع میں مارکیٹس کو آج اور کل کھولنے کی اجازت دے دی۔ محکمہ پرائمری ہیلتھ کئیر پنجاب نے ترمیمی نوٹیفکیشن جاری کر دیا۔ محکمہ پرائمری ہیلتھ کئیر پنجاب کی جانب سے جاری کر دہ ترمیمی نوٹیفکیشن میں کہا گیا کہ شاپنگ مالز سمیت مارکیٹس ہفتے اور اتوار کو بند رہیں گی، آج اور کل شاپنگ مال اور مارکیٹس معمول کے مطابق کھلیں گی۔ نوٹفیکشن میں کہا گیا کہ ریسٹورنٹ، سینیما، جمنیزیم بھی آج کھلے رہیں گے، فیصلے کا اطلاق لاہور، ننکانہ صاحب، شیخوپورہ، قصور پر ہوگا، فیصلے کا اطلاق گوجرانوالہ، نارووال، حافظہ آباد، سیالکوٹ پر ہوگا۔ لاہور میں سموگ کے ڈیرے، ایئر کوالٹی انڈیکس 455 ریکارڈ یاد رہے پنجاب کے نگران وزیر اعلیٰ محسن نقوی نے اسموگ کے پیش نظر صوبے بھر میں ماحولیاتی ایمرجنسی کے نفاذ کا اعلان کرتے ہوئے جمعرات سے اتوار تک صوبے بھر میں دفاتر اور اسکولوں کی چھٹی کا اعلان کیا۔ نگران وزیر اعلیٰ محسن نقوی نے کہا کہ اس وقت لاہور دنیا کا آلودہ ترین شہر ہے اور کسی بھی طریقے سے لاہور اور صوبے شہریوں کے لیے اچھی چیز نہیں ہے، آج ہمارا تفصیلی اجلاس ہوا جس میں بچوں کو جو سانس اور آنکھوں کے جو مسائل پیش آ رہے ہیں اس کا جائزہ لیا گیا، اس کی اصل وجہ بھارت میں جلائی جانے والی فصل ہے، فصل ہمارے ہاں بھی جلائی جا رہی ہے لیکن بھارت میں جلائی جانے والی فصل ہم سے چار گنا زیادہ ہے اور اس کے تمام اثرات ہم پر مرتب ہو رہے ہیں۔ انہوں نے کہا کہ اجلاس میں اس بات پر گفتگو کی گئی کہ کیا کیا انتظامات کیے جائیں اور وہ کیا انتظامات ہیں جس کی بدولت ہم ان اثرات کو 10 سے 15 فیصد کم کر دیں، اس سلسلے میں اجلاس میں چند فیصلے کیے گئے ہیں۔ محسن نقوی نے کہا کہ 9 نومبر کی چھٹی کا پورے پاکستان میں اعلان ہو چکا ہے تو جس طرح ہم نے آشوب چشم کی بیماری کے پھیلاؤ کے موقع پر اقدامات کیے تھے، اسی فارمولے کے تحت ہم 10نومبر کو بھی پنجاب بھر میں دفاتر اور اسکولوں کی چھٹی کا اعلان کر دیں گے۔ ان کا کہنا تھا کہ ہفتہ اتوار پہلے ہی چھٹی ہے اور جن اسکولوں میں ہفتے کو چھٹی نہیں ہوتی ہم وہاں بھی چھٹی کا اعلان کر رہے ہیں جبکہ اکثر دفاتر بھی ہفتے کے روز بند ہوتے ہیں۔ انہوں نے کہا کہ ہم ماحولیاتی ایمرجنسی نافذ کررہے ہیں جس کے تحت یہ سارے فیصلے کررہے ہیں، مارکیٹس ہفتے کو بند ہوں گی اور اتوار کو ویسے ہی بند ہوتی ہیں، ریسٹورنٹس، سینما گھر بھی جمعہ، ہفتہ اور اتوار بند ہوں گے۔ ان کا کہنا تھا کہ وزیر صحت نے صحت کے مسائل پر بریفنگ دی کہ ہسپتال میں مریضوں کی تعداد میں اضافہ ہو چکا ہے اور بزرگوں کو سانس لینے میں تکلیف ہو رہی ہے، ہمارے ان اقدامات کا مقصد مسائل میں کمی لانا ہے کیونکہ ان کا خاتمہ تو ناممکن ہے، 9 نومبر کو بارش کا بھی امکان ہے اور اگر زیادہ بارش ہوتی ہے تو اس سے بھی کافی فرق پڑے گا۔ انہوں نے کہا کہ دہلی اور ہمارے معاملات ایک جیسے ہی ہیں، دہلی میں بھی انہوں نے اسکول بند کیے ہیں، ان کو بھی کافی سکت فیصلے کرنے پڑے ہیں تو ہم ان شہروں کی بھی نگرانی کررہے ہیں جہاں شدید اسموگ ہوتی ہے۔ ان کا کہنا تھا کہ بیکریاں اور فارمیسیز کھلی رہیں گی، شادی ہال بھی کھلے رہیں گے، جمعہ، ہفتہ اور اتوار تمام قسم کے پارکس بند رہیں گے جبکہ پبلک ٹرانسپورٹ کھلی رہے گی، اس کے علاوہ ہیلتھ ایمرجنسی کے ایس او پیز کا اعلان کر رہے ہیں۔ محسن نقوی نے عوام سے اپیل کی کہ وہ چھٹی کے دنوں میں اگر لاہور میں رہنا چاہتے ہیں تو اپنے گھروں میں رہیں اور اگر باہر جانا چاہتے ہیں تو پنجاب کے دیگر سیاحتی مقامات پر جا سکتے ہیں لیکن لاہور پر دباؤ کم کریں۔ انہوں نے عوام سے کہا کہ وہ ماسک ضرور پہنیں، بچوں اور بزرگوں ہر صورت ماسک پہنچائیں کیونکہ آپ سب کی زندگیاں ہمارے لیے بہت قیمتی ہیں۔