لندن:(ویب ڈیسک)عالمی میڈیا کی اطلاعات کے مطابق سوشل میڈیا پلیٹ فارم ٹوئٹر (ایکس) پر جلد ہی ممکنہ طور پر غیر متحرک ٹوئٹر اکاؤنٹس کی خرید و فروخت شروع کی جائے گی جس کے مطابق ایکس پر کسی بھی غیر متحرک اکاؤنٹ کو زیادہ سے زیادہ 50 ہزار امریکی ڈالر میں خریدا یا فروخت کیا جائے گا۔ امریکی جریدے ’فوربز‘کا کہنا ہے کہ ٹوئٹر ایکس کے ایک ملازم نے نام نہ بتانے کی بنیاد پر معلومات فراہم کیں ہیں، جس میں اس ملازم کا کہنا تھا کہ جلد ہی ایکس پر ایک ایسا مارکیٹ پلیس فیچر متعارف کرایا جا رہا ہے جہاں غیر متحرک اکاؤنٹس کی خرید و فروخت کی جا سکے گی اورجو بھی ان اکائونٹس کو خریدنا چاہے گا وہ خرید سکے گا۔ ایسک کے اس منصوبے کے تحت صارفین اپنی مرضی کے وہ اکاؤنٹس خرید سکیں گے جو ٹوئٹر ایکس پر پہلے سے ہی موجود ہیں لیکن وہ کسی اور کی ملکیت ہیں یا پھر انہیں بنا کر غیر متحرک چھوڑ دیا گیا ہے، یعنی خریدنے والے افراد کوئی ایسا اکاؤنٹ بھی خرید سکیں گے جو انکے نام سے بنا ہوا ہو یا پھر کوئی بھی کمپنی پہلے ہی اپنے نام کے بنے ہوئے اکاؤنٹ کو خرید سکے گی۔ اطلاعات کے مطابق ٹوئٹر ایکس پر تقریبا ڈیڑھ ارب ایسے اکاؤنٹس ہیں جو غیر متحرک ہیں یا پھر انہیں کبھی کبھار ہی استعمال کیا جاتا ہے اور یہ ان میں سے کروڑوں اکاؤنٹس ایسے ہیں جو ملتے جلتے ناموں سے بنے ہوئے ہیں۔ اگرچہ فوری طور پر ٹوئٹر ایکس نے اس خبر کی تصدیق یا تردید نہیں کی لیکن فوربز کو ٹوئٹر کے حالیہ ملازم کیجانب سے بھیجی گئی ای میل میں بتایا گیا ہے کہ جلد ہی ایکس پر ایسا فیچر پیش کیا جائیگا جس کے تحت کوئی بھی اکاؤنٹ کو خرید یا فروخت کر سکے گا۔ کسی بھی ایکس اکائونٹ کے خریدنے اور بیچنے کے معاملات میں انتظامیہ ثالثی کا کردار ادا کرے گا اور خریدنے اور بیچنے والے کے درمیان اپنی فیس کا کچھ حصہ لیکر ڈیل ڈن کروائے گا اور زیادہ سے زیادہ کسی اکاؤنٹ کی قیمت 50 ہزار امریکی ڈالر یعنی پاکستانی تقریبا ڈیڑھ کروڑ روپے لگائی جائے گی۔ خیال ظاہر کیا جا رہا ہے کہ ایکس پر مذکورہ فیچر اگلے چند ماہ میں پیش کیا جائیگا، زیادہ تر امکان یہی ہے کہ اسے 2024 کے وسط سے قبل ہی متعارف کرا دیا جائے ۔