فلوریڈا :(ویب ڈیسک) امریکا کی ریاست فلوریڈا میں قائم ایڈوینتھ ہیلتھ کیساتھ منسلک ایک کارڈیالوجی سپشلسٹ ڈاکٹر علی السامرہ نے ایک کم عمر مریض کی جان بچانے کیلئے اپنا بون میرو عطیہ کردیا۔ سوشل میڈیا پر شیئر ہونے والی پوسٹ میں بتایا گیا ہے کہ ایک ڈاکٹر کیجانب سے بے لوث انسان دوستی پر مبنی اس غیر معمولی اقدام نے لوگوں کے دل جیت لیے ہیں۔ فوٹو اور ویڈیو شیئرنگ سوشل میڈیا ایپ انسٹا گرام کاکہنا ہے کہ جب ڈاکٹر علی السامرہ کو یہ پتہ چلا کہ ایک بچے کو انتہائی مشکل صورتحال میں بون میرو کی فوری ضرورت ہے اور وہ امکانی طور پر یہ ڈاکٹراس بچے کے لیے بہترین میچ ہیں تو انہوں نے بلا ہچکچاہٹ اسکی جان بچانے کیلئے اپنا بون میرو اسے دینے کا فیصلہ کیا۔ امریکی 39 سالہ ڈاکٹر علی السامرہ نے سوشل میڈیا ایپ پر موجود پیج پر کہا کہ انہیں کچھ چھوٹے موٹے سے زخم جیسی تکلیف ہے لیکن خوشی ہوگی کہ وہ بچے کی مدد کرسکے۔ ڈاکٹر علی السامرہ کا کہنا تھا کہ انکے سامنے اپنے ایک کینسر سے نبرد آزما دوست کی مثال تھی، جسکی جان ایک ڈونر کی وجہ سے بچی، وہ اس عطیہ کرنیوالے کے جذبے سے بہت متاثر تھے اور چاہتے ہیں کہ دوسرے لوگ بھی اس پر عمل کرکے زندگیاں بچائیں۔ انہوں نے کہا کہ مجھے امید ہے جب یہ پیغام لوگوں تک پہنچے گا تو اس سے ان میں بون میرو کے عطیے کے لیے آگہی پیدا ہوگی اور مریضوں کے لیے ڈونر پول کا دائرہ کار وسیع ہوگا۔ ڈاکٹر علی السامرہ کے اس غیر معمولی اقدام پر مبنی شیئر پوسٹ ہونے پر 45 ہزار لائیکس آئے جبکہ بڑی تعداد میں لوگوں نے ان کے انسانی جذبے کو سراہا۔ ایک سوشل میڈیا صارف کا کہنا تھا کہ ڈاکٹر صاحب آپ نے اپنے طبی حلف سے حقیقی طور پر وفاداری نبھائی، ایک اور نے کہا یہ بہت خوبصورت اقدام ہے، کرہ ارض پر ایسے مزید مثالوں کی ضرورت ہے۔