ایمسڈیم:(ویب ڈیسک) نیدرلینڈز کی ایک یونیورسٹی میں کی گئی نئی تحقیق سے پتہ چلا ہے کہ کرکرا کھانا کھانے سے وزن میں کمی ہوتی ہے، نیدرلینڈز کی ویگینِنجین یونیورسٹی میں کی جانیوالی تحقیق کے نتائج کے مطابق کھاتے وقت اگر کھانا زیادہ چبانا پڑے تو کھانے کی رفتار عمومی رفتار سے نصف کم ہو جاتی ہے۔ ماہرین کا کہنا ہے کہ کرکرا کھانے سے پیٹ بھرنے کا احساس بھی جلدی ہوجاتا ہے جس کے سبب 20 فی صد کم کھانا کھایا جاتا ہے۔ تحقیق میں محققین کا کہنا ہے کہ 50 افراد کو چار ایک جیسے دوپہر کے کھانے دیے گئے، ان کھانوں میں دو انتہائی پروسیسڈ جبکہ باقی دو معمولی سے پروسیسڈ تھے، ہر کیٹگری میں ایک کھانا ایسا تھا جو سخت اور کرکرا تھا اور اسکو کھانا مشکل تھا جبکہ دیگرباآسانی سے کھائے جاسکتے تھے۔ تحقیق میں پتہ چلا ہے کہ کھانے کے پروسیسڈ ہونے پر جب کھانا سخت تھا تب حراروں کی کھپت میں 26 فی صد کمی دیکھی گئی جسکی وجہ ممکنہ طور پر کھانے کا آسانی سے حلق سے نہ اتارا جانا ہوسکتی ہے۔ ان کھانوں میں آلو کے بھرتے کے بجائے ابلے ہوئے چاول، کول سلو کے بجائے کرکری سلاد اور فِش بائٹس کے بجائے خوب چبا کر کھایا جانے والا چکن کا پیس شامل تھا۔ دیگر کھانوں میں کین میں بند نرم آموں کے بجائے سخت تازہ سیب اور ذائقہ دار دہی کے بجائے گاڑھی اور بے ذائقہ دہی جبکہ ٹارٹر ساس کے بجائے ٹماٹر کے سلائس شامل تھے۔ تمام کھانے حراروں کی ایک جیسی مقدار پر مشتمل تھے اور انکی درجہ بندی انکے ذائقے کے حساب سے کی گئی تھی لیکن لوگوں نے سخت اور کرکرے کھانوں میں حراروں کی کھپت کم کی کیوں کہ انہوں نے کھانا کم کھایا تھا۔ یہ بھی پڑھیں https://sunonews.tv/04/12/2023/latest/57772/ تحقیق کے سینئر مصنف پروفیسر سیارن فورڈے نے کہا ہے کہ انکے پاس اس بات کے اب ایک دہائی سے زیادہ کے شواہد موجود ہیں کہ لوگ اس ساخت کا کھانا پسند کرتے ہیں جو انکو سست کھانے کی حوصلہ افزائی کرتی ہے۔ کرکرے، سخت یا زیادہ چبانے والے کھانے حراروں کی کم کھپت میں مدد دے سکتے ہیں جبکہ اطمینان مکمل کھانے کے برابر ہی فراہم کرتے ہیں۔