کراچی: (سنو انویسٹی گیشن سیل) اینٹی کرپشن سندھ میں انکوائریاں سست روی کا شکار، 300سے زائد انکوائریاں تاحال مکمل نہ ہوسکیں۔ میگا کرپشن ، کروڑوں کی خوردبرد، غیر قانونی ترقیاں، جعلی بھرتیوں اور گھپلوں کی تحقیقات سرد خانے کی نذر ہوگئیں۔ گذشتہ حکومت کا سیاسی دباؤ بھی ایک وجہ قرار، نگران حکومت کے بھی انکوائریوں کیلئے خاطر خواہ اقدام نظر نہیں آرہے۔

سنو انویسٹی گیشن سیل کے مطابق نوشہرو فیروز ایم 6 سکھر حیدرآباد موٹر وے میں 3.5 ارب کی روپے کی کرپشن کی تحقیقات بھی مکمل نہیں ہوسکی ہے۔23 ڈسٹرکٹ کونسل میں 6.7 ارب روپے کی خورد برد کی انکوائری مکمل ہونے کا انتظار ہے۔

ٹاؤن کمیٹی ضلع مٹیاری میں غیر قانونی بھرتیوں میں اربوں روپے کی کرپشن کی تحقیقات بھی جاری ہے۔ شہید بے نظیر آباد میں ڈائریکٹر پرائمری اسکول میں اربوں روپے کی کرپشن کی تحقیقاتی رپورٹ کا انتظار ہے ۔

سوشل ویلفیئر ڈیپارٹمنٹ کے سابق سیکرٹری کے خلاف اربوں روپے کی کرپشن کا کیسز بھی التوا کا شکار ہے۔اس کے علاوہ محکمہ خوراک دادو میں کروڑوں کی کرپشن کی انکوائری بھی تاخیر کا شکار ہے۔ محکمہ صحت ، محکمہ آبپاشی ، محکمہ زراعت اور محکمہ خوراک میں کرپشن خورد برد کی تحقیقات سرد خانے کی نظر ہو گئی ہے۔

بلدیہ عظمیٰ کراچی ، سندھ بلڈنگ کنٹرول اتھارٹی ، کراچی ورکس اینڈ سروسز ڈیپارٹمنٹ اور غیر قانونی تجاوزات کی انکوائری بھی تاحال مکمل نہیں ہوسکی ہے۔ بلدیہ عظمیٰ کراچی کے اسپتال غیر قانونی بھرتیوں اور ترقیوں پر انکوائری رپورٹ کا انتظار ہے۔

محکمہ زراعت میرپور خاص ڈویژن کے افسران کے خلاف میگا کرپشن کی تحقیقات بھی مکمل نہیں ہوسکی ہے ۔ اینٹی کرپشن میں سفارش پر بھرتیوں کا کیس بھی آگے نہیں بڑھ سکا ہے۔ٹھٹھہ میں تقریحی پارک اینڈ کلچر کمپلیکس کی تعمیر میں گھپلوں کی تحقیقات بھی تاحال مکمل نہیںہوسکی ۔

بورڈ آف سیکنڈری ایجوکیشن لاڑکانہ میں غیر قانونی بھرتیوں کی انکوائری بھی تاخیر شکا0ر ہے جبکہ سرکاری ادویات اور میٹریل کی نجی اسٹورز پر فروخت کا کیس بھی سرد خانے کی نظر ہو چکا ہے۔