لاہور:(سنو نیوز) پاکستان ایشین گیمز کے کبڈی مقابلوں میں سیمی فائنل میں پہنچ گیا ہے، ملائیشیا کیخلاف پاکستان کبڈی پلیئرز نے شاندار کھیل کا مظاہرہ کیا۔ پول راؤنڈ کے آخری میچ میں گرین شرٹس 35-58 پوائنٹس سے فاتح رہی، ایشین گیمز کے کبڈی مقابلوں کے سیمی فائنلز 6 اکتوبر کو ہوں گے۔ پاکستان ٹیم نے میچ میں 8 آل آؤٹ اور 7 بونس پوائنٹس بھی لیے، پاکستان نے اس سے قبل گروپ میچ میں کوریا کو بھی شکست دی تھی، دفاعی چیمپئن ایران کے خلاف میچ میں پاکستان کو شکست ہوئی تھی۔ خیال رہے کہ ایشین گیمز میں انڈیا نے سکواش میں پاکستان کو شکست دی تھی، بھارت نے پاکستان کو ٹیم ایونٹ میں ایک کے مقابلے میں دو گیم سے شکست دیکر چیمپئن بننے کا اعزاز حاصل کیا تھا۔ پہلے گیم میں پاکستان کے ناصر اقبال نے بھارتی کھلاڑی مہیش کو یکطرفہ معرکے میں بھی 3-0 سے شکست دی جبکہ دوسرے گیم میں بھارت کے سوروو گھوشل نے پاکستان کے محمد عاصم کو 3-0 سے ہرا دیا۔ مینز سنگلز ٹیم ایونٹ کا تیسرا گیم دلچسپ اور سسنی خیز رہا، بھارت کے ابھے سنگھ نے بیسٹ آف فائیو سیٹ کے مقابلے میں 3-2 سے کامیابی حاصل کی، انکی فتح کا سکور 11-7، 8-11، 9-11، 11-9 اور 12-10 رہا۔ دوسری جانب بھارت کے ہاتھوں ایشین گیمز میں پاکستان کو ٹینس کے مکسڈ ڈبل میں بھی بدترین شکست کا سامنا کرنا پڑا تھا۔ انڈین ٹیم نے پاکستانی ٹیم کو اسٹریٹ سیٹس میں شکست دی۔ 43 سالہ پاکستانی ٹینس پلیئر عقیل خان بھارتی خاتون کھلاڑی انکیتا کی سروس بھی نہ کھیل پائے۔ سابق ٹینس کھلاڑی رشید ملک کا سنو نیوز سے گفتگو کرتے کہنا تھا کہ نوجوان کھلاڑی پاکستان چھوڑ کر جا رہے ہیں، ایسوسی ایشن میں کوئی سلیکشن کمیٹی ہی نہیں، اچھے نوجوان کھلاڑی موجود ہیں لیکن ان کو چانس ہی نہیں ملتا۔ ٹینس فیڈریشن نے نوجوان کھلاڑیوں کی گیم میں 43 سالہ کھلاڑی کو کیوں بھیجا؟ کیا پاکستان میں ایک بھی نوجوان ٹینس کھلاڑی موجود نہیں؟ بین الاقوامی سطح پرٹینس کھلاڑی اوسطاً 33 سال کی عمر میں ریٹائر ہو جاتے ہیں۔ راجر فیڈررجیسے سپر اسٹار بھی 41 سال کی عمر میں ریٹائر ہو گئے تھے، عقیل خان 43 سال کی عمر میں بھی ریٹائر نہیں ہو رہے ہیں، دنیا کے اس وقت ٹاپ ٹین کھلاڑیوں میں صرف نوواک جوکو وچ تیس سال سے اوپر ہیں۔