اسلام آباد: نجی ہاؤسنگ سوسائٹی میں واقع اسکول کے طلبہ میں لڑائی جھگڑے کا واقعہ پیش آیا، اسلام آباد پولیس نے مار پیٹ کرنیوالے طلبہ کو حراست میں لے لیا۔ سوشل میڈیا پر وائرل ویڈیو کے مطابق اسلام آباد کی نجی ہاؤسنگ سوسائٹی میں اسکول طلبہ کے درمیان مار پیٹ کا واقعہ پیش آیا۔ وائرل ویڈیو کی فوٹیج میں سامنے آیا کہ اسکول کی چھٹی کے بعد مرکزی دروازے کے باہر 15 سالہ طالبعلم کو دو طالب علموں نے تشدد کا نشانہ بنایا ۔ اسلام آباد پولیس کے مطابق ہم جماعت طلبہ کے درمیان اہل خانہ کو میسجز پر ہراساں کرنے کے نتیجے میں لڑائی ہوئی۔ اس لڑائی میں ایک طلب علم کا بھائی بھی شامل ہو گیا اور دوسرے طلب علم کو تشدد کا نشانہ بنایا۔ طالب علم کے بھائی کا کہنا ہے کہ پہلے ہی انکے خلاف بیس ایف آئی آرز درج ہیں اکیس ہوگئیں تو کوئی مسئلہ نہیں ہے۔

ڈی ایچ اے سکول کے بچوں میں لڑائی جھگڑے کا معاملہ۔
بچوں کی لڑائی میں ایک بچے کے بڑے بھائی نے دوسرے بچے کو مارا پیٹا۔ واقعہ رپورٹ ہونے پر متعلقہ پولیس نے قانونی کارروائی عمل میں لاتے ہوئے مار پیٹ کرنیوالےلڑکےکو گرفتارکرلیا۔
بچوں کی لڑائی بچوں تک ہی محدودرکھیں۔ اور تشدد سے مانع رہیں pic.twitter.com/ixlUKFqsMn

— Islamabad Police (@ICT_Police) October 3, 2022

دوسری جانب متاثرہ طالب علم کے اہل خانہ نے واقعہ پر ردعمل دیتے ہوئے کہا ہے کہ تشدد کا شکار طالب علم کا میڈیکل کروا کر معاملے کی ایف آئی آر درج کرائیں گے۔ پولیس کا کہنا ہے کہ مار پیٹ کرنے والے دونوں بھائیوں کو گرفتار کر لیا گیا ہے۔