لاہور کی احتساب عدالت نے منی لانڈرنگ ریفرنس میں وزیر اعظم شہبازشریف کی مستقل حاضری معافی کی درخواست منظور کرلی۔ عدالت نے آئندہ سماعت پر نیب کے گواہوں کو طلب کرتے ہوئے کارروائی 25 اکتوبر تک ملتوی کر دی۔ احتساب عدالت کے جج قمر الزماں نے وزیراعظم شہبازشریف انکے بیٹے حمزہ شہباز سمیت دیگر ملزمان کے خلاف منی لانڈرنگ ریفرنس پر سماعت کی۔ وزیراعظم کے وکیل امجد پرویز پیش ہوئے اور شہباز شریف اور حمزہ شہباز کی حاضری معافی کی درخواست دائر کی جس میں موقف اختیار کیا گیا کہ وزیر اعظم کابینہ اجلاس کے باعث عدالت پیش نہیں ہوسکتے جبکہ حمزہ شہباز کمر درد میں مبتلا ہیں اور عدالت نے انہیں آرام کا مشورہ دیا ہے لہذا حاضری معافی کی درخواست منظور کی جائے۔ دوران سماعت نیب نے وزیراعظم شہبازشریف کی مستقل حاضری کی درخواست پر جواب جمع کرایا جس کے بعد عدالت نے شہباز شریف کی مستقل حاضری کی درخواست منظور کرلی اور انہیں عدالت پیشی کے لیے نمائندہ مقرر کرنے کی اجازت دے دی۔ عدالت نے آئندہ سماعت پر نیب کے گواہوں کو بیانات کےلیے طلب کرتے ہوئے منی لانڈرنگ ریفرنس پر کارروائی 25 اکتوبر تک ملتوی کر دی۔