بین الاقوامی خبر رساں اداروں کے مطابق یورپی اسٹاک مارکیٹس میں ڈیسالٹ ایوی ایشن کے شیئرز 1.64 فیصد گر گئے ہیں۔ ماہرین اس کمی کو بھارتی رافیل طیاروں کی میدانِ جنگ میں ناکامی سے جوڑ رہے ہیں، جو پاک فضائیہ کی پیشہ ورانہ مہارت کا واضح ثبوت ہے۔

واضح رہے کہ رافیل طیارے دنیا کے جدید ترین لڑاکا طیاروں میں شمار ہوتے ہیں، اور بھارت نے حال ہی میں فرانس سے مزید 26 رافیل طیاروں کی خریداری کا معاہدہ بھی کیا تھا۔ تاہم اس واقعے کے بعد بھارت کی دفاعی پالیسی اور اس مہنگے معاہدے پر شدید سوالات اٹھنے لگے ہیں۔

پاکستان کا بھارت کو بھرپور جواب، 5 طیارے مار گرائے

بھارت کے اندر بھی سوشل میڈیا صارفین اور عسکری تجزیہ نگاروں نے رافیل طیاروں کی ناکامی پر شدید تنقید کی ہے، جس سے بھارتی حکومت اور دفاعی ادارے دباؤ کا شکار نظر آتے ہیں۔

قابلِ ذکر بات یہ ہے کہ اس سے قبل گزشتہ پانچ روز میں ڈیسالٹ ایوی ایشن کے شیئرز میں 3.4 فیصد اضافہ ریکارڈ کیا گیا تھا، جو اب اچانک گراوٹ کا شکار ہو گئے ہیں۔

پاک فضائیہ کی کامیاب کارروائی نے نہ صرف دشمن کو نقصان پہنچایا بلکہ عالمی سطح پر بھارتی دفاعی خریداری کی ساکھ کو بھی متاثر کیا ہے۔