تفصیلات کے مطابق جنوبی کوریا کے جنوب مشرقی علاقے میں 21 مارچ 2025 کو لگنے والی آتشزدگی پر ابھی تک قابو نہیں پایا جا سکا، جس کے نتیجے میں 18 افراد ہلاک اور 19 زخمی ہو گئے ہیں۔

مزید برآں آتشزدگی کی شدت سے 27 ہزار افراد اپنے گھروں سے نقل مکانی پر مجبور ہو چکے ہیں، یہ آگ جنوبی کوریا کی تاریخ کی بدترین آتشزدگی قرار دی جا رہی ہے۔

غیر ملکی میڈیا کی جانب سے جاری کردہ رپورٹس کے مطابق جنگل کی آگ نے 43,330 ایکڑ رقبے کو اپنی لپیٹ میں لے لیا ہے، جس کے باعث کئی ثقافتی مقامات، بشمول 7 ویں صدی کا مندر، فیکٹریاں، مکانات اور گاڑیاں تباہ ہو چکی ہیں۔ اس آتشزدگی سے ہونے والے نقصانات کا تخمینہ ناقابلِ تصور ہے،جس کے باعث ملک بھر میں خوف و ہراس پھیل گیا ہے۔

جنوبی کوریا کے قائم مقام صدر ہان ڈک سو نے اس آتشزدگی کو جنوبی کوریا کی تاریخ کی بدترین آگ قرار دیتے ہوئے کہا ہے کہ ہمیں اپنی تمام تر صلاحیتیں آگ پر قابو پانے پر مرکوز کرنی ہوں گی، کیونکہ اس سے مزید نقصانات کا خدشہ ہے۔

واضح رہے کہ آگ پر قابو پانے کیلئے ساڑھے 4 ہزار فائر فائٹرز اور 130 ہیلی کاپٹر تعینات کیے گئے ہیں، لیکن تیز ہواؤں کی وجہ سے آگ بجھانے میں مشکلات پیش آ رہی ہیں۔

حکام کا کہنا ہے کہ وہ فوری طور پر تمام وسائل کو بروئے کار لا کر اس قدرتی آفت پر قابو پانے کی کوشش کر رہے ہیں، اور متاثرین کی مدد کیلئے اقدامات بھی کیے جا رہے ہیں۔