غیر ملکی خبر رساں ادارے کی رپورٹ کے مطابق سعودی وزارت حج و عمرہ کی جانب سے عمرہ زائرین کو ہدایت کی گئی ہے کہ زائرین مسجد الحرام میں داخل ہونے اور باہر نکلنے کے لیے مخصوص دروازے استعمال کریں، اس سے ہجوم کے نظم و نسق اور عمرہ زائرین و نمازیوں کے لیے عبادات کی ادائیگی میں آسانی ممکن ہو گی۔

سعودی وزارت حج و عمرہ کی جانب سے نئے ہدایت نامہ سے متعلق وضاحت کی گئی ہے کہ مخصوص دروازوں کا مقصد بھیڑ اور دھکم پیل کو کنٹرول کرنا اور حرم شریف کے اندر نقل و حرکت کی روانی کو برقرار رکھنا ہے۔

ہدایت نامہ میں مزید کہا گیا ہے کہ سعودی وزارت حج و عمرہ کا یہ اقدام زائرین کی سلامتی کو یقینی بنانے اور ان کے روحانی سفر کو آسان بنانے کیلئے کی جانے والی مسلسل کوششوں کا حصہ ہے۔

واضح رہے کہ سعودی عرب کے ادارہ شماریات کی ایک رپورٹ کے مطابق سال 2023 کے مقابلے میں 2024 کی چوتھی سہہ ماہی کے دوران عمرہ زائرین کی تعداد میں 31 فیصد اضافہ ہوا۔

ادارہ شماریات کی رپورٹ میں بتایا گیا کہ گزشتہ برس سعودی عرب آنیوالے عمرہ زائرین کی مجموعی تعداد 35.8 ملین رہی جوکہ گزشتہ برسوں کے مقابلے میں 26 فیصد زیادہ ہے۔