سعودی وزارت حج و عمرہ کی جانب سے جاری ہدایت نامہ میں کہا گیا ہے کہ رواں سال تمام تمام ملکی و غیرملکی حجاج کرام کو ویکسی نیشن لازمی کرانا ہوگی، ویکسی نیشن نہ کرانے کی صورت میں حج کی اجازت نہیں دی جائے گی۔

حکام کے مطابق ویکسین کے بغیر کسی بھی شخص کو حج پیکیج بک کرنے یا رجسٹریشن کرانے کی اجازت نہیں ہوگی، سعودی حکومت کی جانب سے یہ اقدام دوران حج متعدی بیماریوں کے پھیلاؤ کو روکنے کیلئے اٹھایا گیا ہے۔

سعودی وزارت حج و عمرہ کی جانب سے واضح کیا گیا ہے کہ میننجائٹس (گردن توڑ بخار) ایک سنگین بیماری ہے جو رش والی جگہوں پر تیزی سے پھیل سکتی ہے اسی کے پیش نظر حج جیسے بڑے اجتماع کے دوران اس سے بچاؤ کی ویکسی نیشن کو لازم قرار دیا گیا ہے۔

خیال رہے کہ سعودی وزارت حج و عمرہ کی جانب سے یہ اعلان ایسے وقت میں کیا گیا ہے جب حج 2025 کی تیاریاں شروع ہو چکی ہیں اور پاکستان سمیت مختلف ممالک کے ساتھ حج معاہدے کیے جارہے ہیں۔

سعودی حکومت کی جانب سے عازمین حج کو ہدایت دی گئی ہے کہ وہ قبل از وقت ویکسین لگوالیں تاکہ ان کی رجسٹریشن میں کوئی خلل نہ آئے۔