ٹیسلا نے اس تقریب میں "سائبر کیب" متعارف کرایا، جو کہ بغیر سٹیئرنگ ویل اور پیڈلز کے ہوگا۔ یہ نئی ٹیکنالوجی ٹیسلا کے فل سیلف ڈرائیونگ سافٹ ویئر کی ترقی کی ایک نئی شکل ہے، جو کہ نو برس قبل مارکیٹ میں آیا تھا، حالانکہ اس میں ابھی کئی مسائل موجود ہیں۔

 

 

 

بعض مبصرین کا کہنا ہے کہ یہ ٹیسلا کے لیے ایک اہم لمحہ ہے کیونکہ وہ پہلی بار مصنوعی ذہانت سے چلنے والی روبوٹ ٹیکسی لانچ کر رہی ہے۔ تاہم، ناقدین نے اس پر سوال اٹھایا ہے کہ ایلون مسک ابھی تک اپنے سیلف ڈرائیونگ سافٹ ویئر کی کامیابی کو ثابت نہیں کر سکے ہیں، جو کہ ممکنہ طور پر کسی بھی حادثے کو روکنے کے لیے انسانی ڈرائیور کی ضرورت کو ختم کرنے کے قابل نہیں ہے۔

 

 

ساؤتھ کیرولینا یونیورسٹی کے محقق برائنٹ والکر نے اس موقع پر ٹیسلا کی حکمت عملی پر تنقید کی۔ انہوں نے سوال اٹھایا کہ کیا ٹیسلا واقعی اس قابل ہے کہ بغیر انسانی نگرانی کے چلنے والا کوئی سافٹ ویئر یا ہارڈ ویئر پیش کر سکے، خاص طور پر ڈرائیونگ کے میدان میں۔

 

 

 

 

والکر نے یہ بھی کہا کہ ٹیسلا کو ایک ایسا سافٹ ویئر اور ہارڈ ویئر تیار کرنے میں چیلنجز کا سامنا ہے جو انسانی اور ڈیجیٹل انفراسٹرکچر کے اشتراک سے بغیر سٹیئرنگ ویل کے گاڑی چلانے کی صلاحیت رکھتا ہو۔

 

 

 

یہ تقریب اس وقت ہوئی جب امریکی سیفٹی ریگولیٹرز ٹیسلا کے فل سیلف ڈرائیونگ اور آٹو پائلٹ نظام کے بارے میں تفتیش کر رہے ہیں۔ ان پر یہ الزام بھی ہے کہ ان کا انسانی ڈرائیور کو ڈرائیونگ پر توجہ دلانے کا نظام موثر نہیں ہے۔

 

 

اس کے علاوہ، رواں برس فروری میں نیشنل ہائی وے ٹریفک سیفٹی ایڈمنسٹریشن نے ٹیسلا کو مکمل سیلف ڈرائیونگ والی گاڑیاں واپس لینے کے احکامات جاری کیے تھے، جنہوں نے ٹریفک قوانین کی خلاف ورزی کی تھی۔ ٹیسلا ان خامیوں کو دور کرنے کے لیے سافٹ ویئر اپ ڈیٹ کرے گی۔