ذرائع کے مطابق بنگلہ دیش کرکٹ بورڈ ( بی سی بی) نے ٹی ٹوئنٹی ورلڈکپ کھیلنے کیلئے اپنی ٹیم بھارت نہ بھیجنے سے متعلق اپنا فیصلہ تبدیل نہ کرنے کا اعلان کیا ہے۔

ذرائع کا بتانا ہے کہ بنگلہ دیش کے مشیر کھیل ڈاکٹر آصف نذرل اور کھلاڑیوں کے درمیان اجلاس ختم ہو گیا، مشیر کھیل ڈاکٹر آصف نذرل نے کھلاڑیوں کے ساتھ ملاقات کے بعد اعلان کیا ہے کہ بنگلا دیش ٹیم ورلڈکپ کے لیے بھارت نہیں جائے گی۔

مشیر کھیل نے کہا ہم کھیلنا چاہتے ہیں ہمیں اب بھی امید ہے کہ آئی سی سی ہماری بات تسلیم کرے گا،ہم اپنے مؤقف پر قائم ہیں، بھارت میں ہمیں سکیورٹی خطرات کا سامنا ہے، آئی سی سی نے ہمارے تحفظات کو تسلیم نہیں کیا، بھارتی حکومت نے ہمیں قائل کرنے کی کوئی سنجیدہ کوشش تک نہیں کی۔

یہ بھی پڑھیں: پی سی بی نے بابر اعظم کو وطن واپس بلالیا

ان کا کہنا تھا کہ ورلڈ کپ کے بائیکاٹ کا فیصلہ ہماری حکومت کا ہے، ہم نے ہائبرڈ ماڈل کے تحت میچز کروانے کی درخواست کی، ہم ورلڈکپ کھیلنا چاہتے ہیں اور ورلڈکپ کے لیے وینیو سری لنکا ہونا چاہیے، کرکٹرز کو اعتماد میں لیا گیا ہے وہ ہمارے مؤقف سے مکمل طور پر متفق ہیں ۔

دوسری جانب بنگلادیش کرکٹ بورڈ کے سربراہ امین الاسلام کا کہنا ہے کہ ہم اس معاملے کو آخر تک نہیں چھوڑیں گے، یہ ہمارا حق ہے ہم آئی سی سی سے دوبارہ رابطہ کریں گے، ہمارا مؤقف واضح ہے ہم بھارت نہیں جائیں گے، ہم سری لنکا میں کھیلنا چاہتے ہیں۔