کراچی میں میڈیا سے گفتگو کرتے ہوئے سابق کرکٹر یونس خان کا کہنا تھا کہ پاکستانی کرکٹ ٹیم میں مستقل مزاجی کا فقدان ہے، جیت کیلئے اچھا کھیلنا ضروری ہے، سیاست سے باہر نکلیں اور ٹیم کیلئے کھیلیں، اپنے لئے نہیں ملک و قوم کیلئے کھیلیں۔
انہوں نے کہا کہ شاہین شاہ آفریدی بیٹنگ کر سکتا ہے تو دوسرے کیوں نہیں؟ وہ گراؤنڈ میں کھیلتا ہوا نظر آرہا ہے، تبدیلیوں سے گریز کریں چینجز سے کمبی نیشن خراب ہوتا ہے۔
یونس خان کا کہنا تھا کہ نہ بھارت کی ٹیم کمزور ہے اور نہ ہی پاکستان کی، بھارتی ٹیم میں تبدیلیاں کم ہوتی ہیں جو انکا پلس پوائنٹ ہے، بھارت کے کھلاڑیوں کو پتہ ہوتا ہے انہیں کھیلنا ہے، سیاست اور کھیل کو الگ ہونا چاہئے، بھارتی کرکٹرز کا ہاتھ نہ ملانا اسپورٹس مین اسپرٹ کے منافی ہے۔
یہ بھی پڑھیں: پاکستان نے سنسنی خیز مقابلے کے بعد سری لنکا کو شکست دے دی
سابق ٹیسٹ کرکٹر نے کہا کہ بھارتی کھلاڑی اپنی حکومت کی ہدایت پر ہم سے ہاتھ نہیں ملا رہے، اگر ہماری حکومت بھی کہے کہ آپ نے ہاتھ نہیں ملانا تو شاید ہم بھی نہ ملائیں، ہمیں اپنی حکومت کی ہدایت پر عمل کرنا ہوگا، دنیا بہت آگے نکل چکی ہے، ہمیں ہاتھ ملانے یا نہ ملانے سے آگے نکلنا ہوگا۔
ان کا کہنا تھا کہ بحیثیت مسلمان یہ ہمارا فرض ہے کہ ہم ہاتھ ملائیں، اگر کوئی نہیں ملاتا آپ اپنی کوشش جاری رکھیں، پاکستان اور بھارت فائنل میں ہوں تو پھر کیا ہی مزہ ہو گا، بھارتی ہاتھ نہیں ملا رہے لیکن آپ جیت کر انکے آگے ہاتھ بڑھائیں، آپ جیت کر ثابت کریں کہ آپ بہترین اسپورٹس مین ہیں۔
