جنوبی افریقا سے تعلق رکھنے والے معروف کوچ رسل ڈومینگو کو ڈیرن گف کی جگہ لاہور قلندرز کا نیا ہیڈ کوچ مقرر کر دیا گیا ہے۔ یہ فیصلہ ڈیرن گف کی ناگزیر ذاتی وجوہات کے باعث دستیابی نہ ہونے کے بعد کیا گیا۔

لاہور قلندرز کے اعلامیے کے مطابق رسل ڈومینگو ایک تجربہ کار اور کامیاب کوچ ہیں، جنہوں نے جنوبی افریقا اور بنگلہ دیش کی قومی کرکٹ ٹیموں کی کوچنگ کی ہے۔ ان کی حکمت عملی اور نوجوان کھلاڑیوں کو نکھارنے کی صلاحیت نے انہیں کرکٹ کی دنیا میں ایک ممتاز مقام دلایا ہے۔ لاہور قلندرز کی ٹیم کے ویژن سے ان کی تقرری مکمل طور پر ہم آہنگ ہے، جو ایک مضبوط اور مسابقتی اسکواڈ بنانے پر مرکوز ہے۔

دوسری جانب رسل ڈومینگو نے اپنی تقرری پر خوشی کا اظہار کرتے ہوئے کہا کہ میں لاہور قلندرز کے ساتھ 2025 کے پی ایس ایل سیزن کا حصہ بننے پر بے حد پرجوش ہوں۔ میں جلد از جلد کام شروع کرنے، کھلاڑیوں اور مینجمنٹ سے ملنے اور ایک شاندار سیزن کیلئے تیاریوں کا آغاز کرنے کا منتظر ہوں۔

واضح رہے کہ لاہور قلندرز کی ٹیم 11 اپریل کو راولپنڈی کرکٹ اسٹیڈیم میں اسلام آباد یونائیٹڈ کیخلاف اپنا پہلا میچ کھیلے گی۔ اس اہم میچ کیلئے ٹیم کا ہر کھلاڑی اور کوچ پرجوش ہے۔