انٹرنیشنل کرکٹ کونسل (آئی سی سی) کی جانب سے جاری کردہ بیان کے مطابق تینوں کھلاڑیوں کو غیر مناسب رویے کی بنا پر جرمانے کا سامنا کرنا پڑا ہے۔

آئی سی سی کے مطابق شاہین آفریدی پر میچ فیس کا 25 فیصد جرمانہ عائد کیا گیا، جبکہ سعود شکیل اور متبادل کھلاڑی کامران غلام پر میچ فیس کا 10 فیصد جرمانہ کیا گیا ہے۔ یہ جرمانہ آئی سی سی کے کوڈ آف کنڈکٹ کی خلاف ورزی پر عائد کیا گیا ہے۔

تفصیلات کے مطابق شاہین آفریدی نے جان بوجھ کر جنوبی افریقا کے بیٹر میتھیو بریٹزکی کے راستے میں آ کر غیر مناسب انداز میں باڈی کنٹیکٹ کیا اور اس دوران مخالف ٹیم کے بلے باز سے بحث بھی کی۔

دوسری جانب سعود شکیل اور کامران غلام نے ٹیمبا باووما کے آؤٹ ہونے کے بعد ان کے قریب جا کر غیر مناسب انداز میں سیلیبریٹ کیا، جس پر آئی سی سی نے ان دونوں کو بھی جرمانہ عائد کر دیا اور ایک ایک ڈی میرٹ پوائنٹ دے دیا۔

خیال رہے کہ پاکستان اور جنوبی افریقا کے درمیان گزشتہ روز کراچی میں کھیلا جانے والا میچ تاریخی رہا، جس میں پاکستان نے 353 رنز کا پہاڑ جیسا ہدف 4 وکٹوں کے نقصان پر پورا کر کے تین ملکی سیریز کے فائنل کیلئے کوالیفائی کیا۔