ایشین ہاکی چیمپئنز ٹرافی: پاکستان کو سیمی فائنل میں شکست
September, 16 2024
بیجنگ:(ویب ڈیسک) چین نے ایشین ہاکی چیمپئنز ٹرافی کے سیمی فائنل میںپاکستانی ٹیم کو شکست دے کر فائنل کیلئے کوالیفائی کر لیا ہے۔ میچ کے دوران شائقین کو سنسنی خیز مقابلہ دیکھنے کو ملا۔
تفصیل کے مطابق چائنا میں کھیلے جا رہے ایشین ہاکی چیمپئنز ٹرافی ٹورنامنٹ کےپہلےسیمی فائنل میں چین اور پاکستان کی ٹیمیں مدمقابل آئیں ۔ سیمی فائنل میں پاکستان کی طرف سے ایک ہی گول ہوا جوکھلاڑی احمد ندیم نے کیا۔
میچ کے پہلے کوارٹر میں پاکستان اور چین میں سے کوئی بھی گول نہ کرسکا جبکہ دونوں کو کوئی پنالٹی کارنر ہی حاصل نہ ہو سکا، لیکن دوسرے کوارٹر میں پاکستان کو لگاتار 4 پنالٹی کارنر ملے۔
لیکن پاکستانی کھلاڑیوں نے یہ مواقع گنوا دیے۔ 13ویں منٹ میں چائناکو پہلا پنالٹی کارنر ملا ، جس پر چینی کھلاڑی یوان لین لو نے گول کرکےاپنی ٹیم کو برتری دلا دی۔ ہاف ٹائم پر چین کو ایک گول کی برتری حاصل تھی۔
تیسرے کوارٹر میں پاکستانی کھلاڑی احمد ندیم نے گول کرکے چین کی برتری کا خاتمہ کیا۔ اس کے بعد پاکستان کو گول کرنے کے کئی مواقع ملے لیکن گول میں کامیابی نہیں ملی۔ مقررہ وقت تک مقابلہ ایک ایک گول سے برابر رہا۔
سیمی فائنل کو فیصلہ کن بنانے کیلئےدونوں ٹیموں کو 5،5 پنالٹی شوٹ آؤٹ دئیے گئے۔ پاکستان نے ابتدائی 4 پنالٹی شوٹ آؤٹ ضائع کردئیے جبکہ چین نے 4میں سے 2پر گول کرکے فائنل کیلئے کوالیفائی کرلیا ۔
چین نے دوسری بار پاکستان ہاکی ٹیم کو شکست سے دو چار کیا ہے، اس سے قبل 2006 ءکے ایشین گیمز کے سیمی فائنل میں بھی چین نے پاکستان کو شکست دے کر فائنل کے لیے کوالیفائی کیا تھا۔
واضح رہے کہ چین ایشین ہاکی چیمپئنز ٹرافی کے فائنل میں پہلی بار پہنچا ہے۔
