رواں ماہ بھارتی شہر جام نگر میں منعقد ہونے والی اننت امبانی کی عالیشان شادی کی تقاریب میں دنیا بھر کی نامور شخصیات مدعو تھیں۔ اس دوران افواہیں گردش کر رہی تھیں کہ پاکستانی کرکٹر بابر اعظم بھی اس شادی میں شرکت کریں گے۔

 

 

افواہوں نے اس وقت زور پکڑا جب 15 جولائی 2024 ء کو سوشل میڈیا پر، بشمول تھریڈز صارف  نور حسین خان  اور فیس بک پیج  مہاجر کمیونٹی  نے دعویٰ کیا کہ بابر اعظم کو مکیش امبانی کی جانب سے ان کے بیٹے اننت کی شادی میں شرکت کے لیے 90 کروڑ روپے کی پیشکش کی گئی۔

 

 

یہ افواہیں مارچ 2024 ءمیں ایک ہندوستانی میم پیج @being_humour کی جانب سے طنزیہ پوسٹ کے بعد شروع ہوئیں۔ اس پوسٹ میں مزاحیہ انداز میں کہا گیا تھا کہ مکیش امبانی نے بابر اعظم کو 10 کروڑ کی پیشکش کی تھی جو بابر اعظم نے ٹھکرا دی۔ یہ پوسٹ تیزی سے وائرل ہوگئی اور صارفین نے بغیر تصدیق کے اسے شیئر کرنا شروع کر دیا۔

 

 

افواہوں کے پھیلنے کے بعد بابر اعظم کی ٹیلنٹ مینجمنٹ کمپنی، Saya Corps، نے بیان جاری کیا۔ اس بیان میں انہوں نے تمام غیر مصدقہ خبروں کی تردید کی۔ کمپنی کا کہنا تھا کہ بابر اعظم کو مکیش امبانی کے بیٹے کی شادی میں شرکت کے لیے کبھی رقم کی پیشکش نہیں کی گئی اور نہ ہی انہیں اس شادی میں شرکت کے لیے مدعو کیا گیا تھا۔

 

 

ٹیلنٹ مینجمنٹ کمپنی نے واضح کیا کہ بابر اعظم کی امبانی ویڈنگ میں شرکت کی خبریں محض افواہیں ہیں اور ان کا حقیقت سے کوئی تعلق نہیں۔ اس بیان کے بعد سوشل میڈیا پر پھیلنے والی افواہیں ختم ہو گئیں اور بابر اعظم کے مداحوں کو حقیقت معلوم ہو گئی۔

 

یہ واضح ہے کہ بابر اعظم کو امبانی ویڈنگ میں شرکت کی کوئی پیشکش نہیں کی گئی تھی اور تمام افواہیں ایک طنزیہ پوسٹ سے شروع ہوئیں۔ سوشل میڈیا پر غیر مصدقہ خبروں کو شیئر کرنے سے قبل ان کی تصدیق ضروری ہے تاکہ اس طرح کی غلط فہمیاں پیدا نہ ہوں۔