سرکاری حج اسکیم، دوسری قسط کی وصولی آج رات شروع ہوگی
وزارت مذہبی امور کے مطابق سرکاری اسکیم کے عازمین 5 اکتوبر سے 20 اکتوبر تک حج کی دوسری قسط جمع کرا سکیں گے۔
دوسری قسط کی ادائیگی پاک حج ایپ اور ڈیجیٹل حج پورٹل کے ذریعے کی جائے گی۔ وزارت مذہبی امور نے واضح کیا ہے کہ حج پیکیج میں تبدیلی کی سہولت بھی آج رات 12 بجے بند کردی جائے گی۔
پیکیج میں ترمیم کے خواہش مند عازمین کو ہدایت کی گئی ہے کہ وہ مقررہ وقت سے پہلے اپنی کارروائی مکمل کرلیں۔
وزارت مذہبی امور کے مطابق دوسری قسط جمع کرانے سے قبل میڈیکل فٹنس سرٹیفکیٹ اپ لوڈ کرنا لازمی ہوگا۔
یہ بھی پڑھیں: آئی فون 18 پرو میکس خریدنے کا نیا طریقہ، اقساط کی سہولت دستیاب
عازمین حج اپنا میڈیکل فٹنس سرٹیفکیٹ پاک حج ایپ یا ڈیجیٹل حج پورٹل پر اپ لوڈ کر سکیں گے۔
وزارت مذہبی امور نے خبردار کیا ہے کہ 20 اکتوبر تک دوسری قسط جمع نہ کرانے کی صورت میں حج درخواست منسوخ تصور ہوگی۔
درخواست منسوخ ہونے کی صورت میں عازمین کی جانب سے پہلے جمع کرائے گئے واجبات ان کے متعلقہ اکاؤنٹ میں واپس کردیئے جائیں گے۔
وزارت نے سرکاری حج اسکیم کے عازمین کو مقررہ تاریخ کے اندر دوسری قسط جمع کرانے اور ضروری دستاویزات بروقت مکمل کرنے کی ہدایت کی ہے۔
