سہیل آفریدی کا لانگ مارچ شروع، گورنر راج اور ایمرجنسی مسترد

لانگ مارچ کے شرکا سے خطاب کرتے ہوئے سہیل آفریدی نے کہا کہ پاکستان تحریک انصاف ایک سیاسی قوت اور سیاسی جماعت ہے، جبکہ مذاکراتی کمیٹی اسلام آباد سیاسی درجہ حرارت کم کرنے کے لیے گئی تھی۔

وزیراعلیٰ خیبرپختونخوا نے کہا کہ صوبے میں عمران خان کی حکومت ہے اور ان کے وژن اور پالیسی کے مطابق ہی معاملات چلیں گے۔ ان کا کہنا تھا کہ وہ ایسی کسی پالیسی کو قبول نہیں کریں گے جس سے پشتونوں کو نقصان پہنچے۔

سہیل آفریدی نے کہا کہ خیبرپختونخوا میں کسی صورت گورنر راج یا ایمرجنسی قبول نہیں کی جائے گی۔ ان کے مطابق صوبے میں کوئی نیا آپریشن نہیں ہونا چاہیے۔

یہ بھی پڑھیں: وزیر اعلیٰ کے پی سہیل آفریدی نے مذاکرات کو سبوتاژ کیا، وزیر داخلہ

انہوں نے دعویٰ کیا کہ گزشتہ کئی برسوں سے خیبرپختونخوا کو تجربہ گاہ بنایا گیا اور صوبے پر زبردستی آپریشنز مسلط کیے گئے، جس کے نتیجے میں دہشت گردی دوبارہ بڑھی۔

وزیراعلیٰ نے کہا کہ خیبرپختونخوا حکومت وفاقی حکومت کو امن کے قیام کے لیے ایک پالیسی دے رہی ہے اور اگر اس پر عمل درآمد کیا جائے تو 100 دنوں میں امن قائم کیا جا سکتا ہے۔

سہیل آفریدی نے الزام عائد کیا کہ وفاقی حکومت کی نیت امن کے بجائے پی ٹی آئی کو ختم کرنا ہے، تاہم ان کے بقول یہ کوشش کامیاب نہیں ہوگی۔

انہوں نے کہا کہ عمران خان کے دور میں امن تھا کیونکہ اس وقت پالیسی درست تھی، جبکہ رجیم چینج کے بعد دوبارہ دہشت گردی صوبے پر مسلط کی گئی۔

وزیراعلیٰ خیبرپختونخوا نے لانگ مارچ کے آئندہ مراحل کا اعلان کرتے ہوئے کہا کہ عوام کو اس تحریک میں شرکت کے لیے نکلنا ہوگا۔

ان کے مطابق قافلے کا اگلا اسٹاپ کرک ہوگا، جبکہ اس کے بعد کوہاٹ کا رخ کیا جائے گا۔ انہوں نے دعویٰ کیا کہ صوابی پہنچنے تک لاکھوں افراد لانگ مارچ میں شامل ہوں گے اور یہ تحریک ملک کے دیگر علاقوں تک بھی پھیل چکی ہوگی۔

سہیل آفریدی نے کہا کہ پاکستان کے فیصلوں میں نوجوانوں کا کردار اہم ہے اور حقیقی آزادی کی تحریک کو آگے بڑھایا جائے گا۔