سرکاری ملازمین کیلئے خوشخبری، حکومت کا بڑا اعلان
تفصیلات کے مطابق قومی اسمبلی سیکریٹریٹ نے ایندھن کی بچت اور اخراجات میں کمی کے لیے مختلف کفایت شعاری اقدامات فوری طور پر نافذ کردیے، جن کے تحت 50 فیصد عملہ دفتر جبکہ 50 فیصد گھر سے کام کرے گا۔
گھر سے کام کرنے والے ملازمین کے لیے روٹیشن ڈیوٹی روسٹر تیار کیا جائے گا اور وہ فون، ای میل اور واٹس ایپ پر دستیاب رہیں گے اور ضرورت پڑنے پر انہیں ایک گھنٹے کے نوٹس پر دفتر طلب کیا جاسکے گا۔
گھر سے کام کرنے والے ملازمین کو ڈیلی الاؤنس اور اوور ٹائم نہیں دیا جائے گا، جبکہ مجاز افسر کی اجازت کے بغیر اسٹیشن چھوڑنے کی بھی اجازت نہیں ہوگی۔
کفایت شعاری اقدامات کے تحت سرکاری گاڑیوں کے لیے آئندہ تین ماہ تک ایندھن کی فراہمی میں 50 فیصد کمی کردی گئی ہے، جبکہ نئی گاڑیوں کی خریداری پر مکمل پابندی عائد کردی گئی۔
یہ بھی پڑھیں: انٹرمیڈیٹ و ثانوی تعلیمی بورڈ میرپور کا انٹرمیڈیٹ کے نتائج کا اعلان
مالی سال 2026-27 کے غیر ترقیاتی بجٹ میں ماہانہ بنیادوں پر 5 فیصد کمی کی جائے گی اور قومی اسمبلی سیکریٹریٹ کے تمام اجلاس ترجیحاً ویڈیو کانفرنسنگ کے ذریعے منعقد ہوں گے، جبکہ قائمہ کمیٹیوں کے اجلاس بھی ورچوئل طریقے سے کرنے کی حوصلہ افزائی کی جائے گی۔
کفایت شعاری کے تحت اجلاسوں کی تعداد کم سے کم رکھنے اور تمام پائیدار اشیا کی خریداری پر پابندی کا فیصلہ کیا گیا ہے، تاہم آئی ٹی سامان اس پابندی سے مستثنیٰ ہوگا۔
قومی اسمبلی سیکریٹریٹ میں تین ماہ کے لیے بیرون ملک دوروں پر مکمل پابندی عائد کردی گئی ہے، تاہم اسکالرشپس، تربیتی کورسز، بین الاقوامی پروگرامز اور سرکاری معاہدوں کے تحت ہونے والے تربیتی پروگرام اس پابندی سے مستثنیٰ ہوں گے۔
غیر ملکی وفود کے علاوہ سرکاری عشائیوں اور حکومت کی جانب سے فنڈڈ سیمینارز و کانفرنسز کے انعقاد پر بھی پابندی ہوگی۔ ناگزیر تقریبات کے لیے صرف آڈیٹوریم اور سرکاری سہولیات استعمال کی جائیں گی۔
اخراجات میں مزید کمی کے لیے پیپر لیس ورکنگ ماحول اپنانے کا فیصلہ بھی کیا گیا ہے۔ قومی اسمبلی سیکریٹریٹ کے مطابق یہ تمام کفایت شعاری اقدامات فوری طور پر نافذ ہوں گے اور مزید احکامات تک جاری رہیں گے۔
