عیدالاضحیٰ: سندھ سالڈ ویسٹ مینجمنٹ بورڈ کی "وعدہ کرو" مہم کا آغاز

عید الاضحیٰ اسلام میں قربانی اور فرمانبرداری کے جذبے کی یادگار ہے اور اس مذہبی فریضے کے ساتھ ساتھ صفائی اور ماحول کی حفاظت بھی شہریوں کی اہم سماجی ذمہ داری ہے، خاص طور پر کراچی جیسے بڑے شہر میں جہاں قلیل مدت میں لاکھوں جانور قربان کیے جاتے ہیں۔

سندھ سالڈ ویسٹ مینجمنٹ بورڈ کی سماجی رابطہ ٹیم مہم کے تحت شہر کے مختلف علاقوں میں قربانی کرنے والے شہریوں سے ملاقات کرے گی، ٹیم عوام کے ساتھ دوستانہ بات چیت، آگاہی سیشنز اور گھریلو دوروں کے ذریعے شہریوں کو جانوروں کے فضلے کی مناسب ہینڈلنگ اور ٹھکانے لگانے کے بارے میں تعلیم دے گی۔

مہم کے دوران شہریوں کو ہدایت دی جائے گی کہ فضلہ صرف مقررہ جمع کرنے کے مقامات پر رکھیں، بایوڈیگریڈیبل بیگز استعمال کریں، فضلہ سڑکوں یا نالیوں میں نہ ڈالیں اور صفائی کے عملے کے ساتھ تعاون کریں، قربانی کے فوراً بعد مقامات کو دھوئیں، ’چونا‘ یا ’بالو مٹی‘ چھڑکیں اور ڈس انفیکٹینٹ اسپرے استعمال کریں تاکہ بدبو اور جراثیم کنٹرول ہوں۔

اس دوران سالڈ ویسٹ مینجمنٹ بورڈ اپنے آپریشنل انتظامات بھی جاری رکھے گا، جس میں صفائی کا عملہ، فضلہ جمع کرنے والی گاڑیاں، مانیٹرنگ ٹیمیں اور مربوط انتظامات شامل ہیں تاکہ جانوروں کے فضلے کو بروقت اٹھایا جا سکے، بورڈ نے واضح کیا کہ ادارہ جاتی انتظامات اکیلے صفائی کی ضمانت نہیں دے سکتے، شہریوں کی فعال شرکت لازمی ہے۔

یہ بھی پڑھیں: 'صفائی کے سفیر'، کراچی میں صفائی کیلئے خصوصی مہم کا آغاز

منیجنگ ڈائریکٹر سندھ سالڈ ویسٹ مینجمنٹ بورڈ طارق علی نظامانی نے کہا کہ ’وعدہ کرو‘ مہم کا مقصد شہریوں میں اجتماعی ذمہ داری کا جذبہ پیدا کرنا ہے، عید الاضحیٰ کے موقع پر صفائی ایک مشترکہ فریضہ ہے، جب شہری اور ادارے مل کر کام کریں گے تو کراچی صاف، صحت مند اور منظم انداز میں عید منا سکتا ہے۔

مہم عید کے تیسرے دن تک جاری رہے گی اور شہریوں کو یاد دلائے گی کہ صفائی صرف انتظامی کام نہیں بلکہ ہر شہری کی مشترکہ سماجی ذمہ داری ہے۔