رپورٹ کے مطابق پی آئی اے کی پرواز پی کے 860 نے جدہ سے لاہور کے لئے اڑان بھری تھی، اڑان بھرنے کے کچھ ہی دیر بعد پرواز ناہموار ہو گئی، طیارے کے کیبن میں ہوا کا دباؤ کم ہو گیا جس سے طیارے میں آکسیجن کی کمی ہو گئی۔

جہاز میں خودکار نظام کے تحت مسافروں کی نشستوں پر لگے آکسیجن ماسک نیچے گر گئے، کریو کی جانب سے مسافروں کو فوری آکسیجن ماسک لگانے کی ہدایت کی گئی جس کے باعث بعض مسافر خوف میں مبتلا ہو گئے تاہم پی آئی اے کے عملے نے مسافروں کو تسلی دی اور آکسیجن ماسک لگانے میں مدد فراہم کی۔

ترجمان پی آئی اے کے مطابق کپتان نے حاضر دماغی اور پیشہ وارانہ مہارت کا مظاہرہ کرتے ہوئے طیارے کو کنٹرول کیا، کپتان نے نزدیک ترین دمام ایئرپورٹ کے ایئر ٹریفک کنٹرولر سے رابطہ کیا اور ہنگامی لینڈنگ کی اجازت طلب کی۔

یہ بھی پڑھیں: سولر صارفین کیلئے نیٹ میٹرنگ پالیسی میں بڑی تبدیلیاں

پی آئی اے ترجمان نے بتایا کہ کپتان نے اجازت ملنے پر طیارے کو بحفاظت اتار لیا اور مسافروں کو لاؤنج منتقل کر دیا گیا جہاں مسافروں کو تمام تر سہولتیں فراہم کی گئیں۔

حکام کے مطابق طیارے کو گراؤنڈ کر دیا گیا ہے، واقعہ گزشتہ روز پیش آیا تھا جبکہ مسافروں کو متبادل پرواز کے ذریعے لاہور پہچا دیا گیا ہے ۔