زلزلہ پیما مرکز کے مطابق زلزلے کا مرکز بالاکوٹ اور آزادکشمیر کے درمیان تھا، زلزلہ کی شدت 4.2 جبکہ گہرائی10 کلو میٹر زیر زمین ریکارڈ کی گئی، زلزلے کے جھٹکے وادی نیلم اور وادی جہلم میں بھی محسوس کیے گئے۔
زلزلے کے جھٹکوں کے باعث شہریوں میں خوف و ہراس پھیل گیا، شہری کلمہ طیبہ کا ورد کرتے ہوئے گھروں اور دکانوں سے باہر نکل آئے تاہم خوش قسمتی سے کسی بھی قسم کے جانی و مالی نقصان کی اطلاع موصول نہیں ہوئی۔
واضح رہے کہ زلزلے قدرتی آفت ہیں جس کے باعث دنیا بھر میں اب تک لاکھوں افراد لقمہ اجل بن چکے ہیں اور کئی قومیں تباہ ہو چکی ہیں۔
ماہرین کے مطابق زمین کی سطح تین بڑی پلیٹوں سے بنی ہوتی ہے، پہلی تہہ یوریشین، دوسری بھارتی اور تیسری کا نام اریبین ہے، زیر زمین حرارت جمع ہوتی رہتی ہے تو یہ پلیٹس ایک جگہ سے دوسری جگہ سرکتی ہیں جس سے زمین ہلنا شروع ہو جاتی ہے اور یہی کیفیت زلزلہ کہلاتی ہے۔
یہ بھی پڑھیں: مالاکنڈ اور گردونواح میں شدید زلزلہ
زلزلے کی لہریں دائرے کی شکل میں چاروں طرف یلغار کرتی ہیں اور خوف و ہراس پھیل جاتا ہے، زلزلوں کا آنا یا آتش فشاں کا پھٹنا ان علاقوں ميں بہت ہوتا ہے جو ان پلیٹوں کے سنگم پر واقع ہوتے ہیں۔
خیال رہے کہ زلزلوں کے اعتبار سے پاکستان دنیا کا پانچواں حساس ترین ملک شمار کیا جاتا ہے، پاکستان انڈین پلیٹ کی شمالی سرحد پر موجود ہے جہاں یہ یوریشین پلیٹ سے ملتی ہے، یوریشین پلیٹ کے نیچے دھنسنے اور انڈین پلیٹ کے آگے بڑھنے کا عمل لاکھوں سال سے جاری و ساری ہے۔
پاکستان کے 2 تہائی رقبے کے نیچے سے گزرنے والی تمام فالٹ لائنز متحرک ہیں جہاں کم یا درمیانے درجہ کا زلزلہ وقفے وقفے سے آتا رہتا ہے۔
