ترجمان محکمہ ہاؤسنگ پنجاب کی جانب سے بتایا گیا ہے کہ اپنی چھت اپنا گھر پروگرام کے تحت اب تک 35 ہزار 500 سے زائد خاندان اپنے گھروں کی تعمیر مکمل کر چکے ہیں۔

ان کا کہنا تھا کہ اب تک صوبہ بھر میں پروگرام سے ایک لاکھ 17 ہزار 159 افراد نے استفادہ کیا جبکہ 72 ہزار 254 خاندانوں کے گھر تعمیر کے مراحل میں ہیں، پروگرام کے تحت اب تک 142 ارب روپے سے زائد رقم گھروں کی تعمیر کے لیے مختص کی جا چکی ہے۔

صوبائی محکمہ ہاؤسنگ کے ترجمان نے بتایا کہ 9 برس کے لیے بلاسود قرض کے حصول سے صوبے کے ہزاروں خاندان فائدہ اٹھا رہے ہیں، 5 سال میں 5 لاکھ خاندانوں کو گھروں کی تعمیر کے لیے بلاسود قرض فراہم کیے جائیں گے۔

یہ بھی پڑھیں: اپنی چھت اپنا گھر پروگرام ، نئی اسکیموں کا آغاز

ترجمان کے مطابق اپنی چھت اپنا گھر پروگرام کی کامیابی وزیر اعلیٰ پنجاب مریم نواز کے ویژن کی منفرد مثال ہے، کم آمدنی والے خاندانوں کے لیے انتہائی آسان شرائط کے ساتھ گھروں کی تعمیر کے لیے قرض فراہم کیا جارہا ہے۔

ان کامزید کہنا تھا کہ صوبائی حکومت کے اس منفرد پروگرام کے مثبت اثرات میں تعمیراتی صنعت کا فروغ بھی شامل ہے، پروگرام کے تحت دیہاتوں اور قصبوں میں پختہ گھروں کی تعمیر کا عمل کامیابی سے جاری ہے۔

واضح رہے کہ اپنی چھت اپنا گھر پروگرام کی آفیشل ویب سائٹ کے ذریعے شہری گھر بیٹھے اپنی درخواست جمع کرا سکتے ہیں۔