ترجمان وزارت مذہبی امور کی جانب سے بتایا گیا ہے کہ عازمین حج کی سہولت کے پیش نظر واجبات کی دوسری قسط کی ادائیگی کے لئے آخری مہلت دی گئی ہے، حج واجبات جمع کرانے کی آخری تاریخ میں 3 روز کی توسیع کا فیصلہ ہے۔

وزارت مذہبی امور کی جانب سے ہدایت کی گئی ہے کہ حج درخواست گزار 19 نومبر تک اپنے واجبات لازمی جمع کرائیں،دوسری قسط جمع نہ کرانے پر حج درخواست منسوخ کردی جائے گی۔

یاد رہے کہ اس سے قبل حج واجبات کی دوسری قسط کی ادائیگی کے لیے 15 نومبر کی تاریخ مقرر کی گئی تھی۔

وزارت مذہبی امور کے مطابق اضافی سہولیات مثلا ڈبل بیڈ الگ کمرہ کے درخواست گزاروں کو دوسری قسط کے ساتھ 2 لاکھ فی کس اضافی ، 3 بیڈ والوں کواضافی 67 ہزار فی کس دینا ہونگے، 4 تا 6 افراد، فیملی روم یا شیئرنگ روم کیلئے اضافی اخراجات نہیں۔

یہ بھی پڑھیں: حج 2626، حجاج کرام کے لیے سخت ترین طبی قوانین نافذ

ترجمان کا کہنا تھا کہ عازمین حج کو تاکید کی جاتی ہے بینک میں دوسری قسط جمع کراتے وقت پیکیج کی تفصیلات اچھی طرح سمجھ لیں اور اس کے مطابق واجبات جمع کرائیں، اگر کسی درخواست گزار فیملی کو 2 بیڈ الگ کمرہ یا 3 بیڈ الگ کمرہ درکار ہے تو اس موقع سے فائدہ اٹھائیں اور بینک سے اپنا پیکیج تبدیل کروا کر اضافی رقم جمع کرا دیں۔

واضح رہے کہ رہے کہ تاخیر کی صورت میں یا سعودی عرب پہنچ کر حج پیکیج کی تبدیلی ممکن نہیں ہوگی۔