پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے پشاور کا دورہ کیا ، اس موقع پر انہیں کور ہیڈ کوارٹرز میں سکیورٹی صورت حال، آپریشنل تیاریوں، پاک،افغان سرحد پر امن و استحکام اور انسداد دہشت گردی کی کوششوں پر جامع بریفنگ دی گئی۔

آئی ایس پی آر کے مطابق سپہ سالار نے قبائلی عمائدین کے جرگے کے ساتھ تفصیلی ملاقات بھی کی اور دہشت گردی کے خلاف جنگ میں خیبرپختونخوا کے عوام کی قربانیوں کو زبردست خراج تحسین بھی پیش کیا۔

جرگے سے خطاب میں فیلڈ مارشل سید عاصم منیر نے کہا کہ پاکستان افغانستان سمیت تمام ہمسایوں کے ساتھ امن کا خواہاں ہے، افغانستان کی جانب سے سرحد پار دہشت گردی کے تسلسل کے باوجود پاکستان نے گزشتہ چند سال میں صبر و تحمل کا مظاہرہ کیا ہے اور افغانستان کے ساتھ سفارتی اور اقتصادی تعاون بڑھایا۔

یہ بھی پڑھیں: فورسز کی کارروائیاں، بھارتی حمایت یافتہ 18 دہشتگرد ہلاک

آرمی چیف کا کہنا تھا کہ اس تعاون کا مقصد پاک افغان دوطرفہ تعلقات کو بہتربنانا ہے، تاہم افغان طالبان کی حکومت بھارتی اسپانسرڈ دہشت گرد پراکسیز فتنہ الخوارج اور فتنہ الہندوستان کے خلاف فیصلہ کن کارروائی کرنے کے بجائے ان گروپس کو ہرممکن مدد فراہم کر رہی ہے، افغان طالبان نے دہشت گردوں کیخلاف کارروائی کی بجائے ان کی سرپرستی کی۔

فیلڈ مارشل سید عاصم منیر نے قبائلی عمائدین کو یقین دلایا کہ پاکستان خصوصاً خیبر پختونخوا کو دہشت گردوں اور ان کے سرپرستوں سے پاک کر دیا جائے گا، افغان سرزمین سے دہشت گردی برداشت نہیں کریں گے۔

اس موقع پر قبائلی عمائدین نے فیلڈ مارشل سید عاصم منیرکی جانب سے بے لاگ گفتگو کو سراہا اور پاکستان میں امن کے لیے اپنے غیرمتزلزل عزم کا اظہار کیا۔

قبا ئلی عمائدین نے واضح کیا کہ فتنہ الخوارج کے نظریے کی خیبرپختونخوا کے قبائل میں کوئی قبولیت نہیں ، خیبر پختونخوا کے عوام دہشت گردی اور افغان طالبان کے خلاف مسلح افواج کے شانہ بشانہ کھڑے ہیں۔