شہر قائد میں بھاری بھرکم ای چالان سسٹم کے خلاف سندھ ہائیکورٹ میں آئینی درخواست مرکزی مسلم لیگ کی جانب سے دائر کی گئی، مرکزی مسلم لیگ کراچی کے صدر احمد ندیم اعوان نے عدالت میں درخواست جمع کروا دی،درخواست میں حکومت سندھ، ڈی آئی جی ٹریفک، نادرا اور دیگر کو فریق بنایا گیا ہے۔

درخواست گزار کی جانب سے مؤقف اختیار کیا گیا ہے کہ کراچی کا انفرااسٹرکچر مکمل تباہ ہے، شہر بھر میں روڈ نام کی کوئی چیز موجود نہیں، شہریوں پر بھاری بھرکم چالان کسی عذاب سے کم نہیں، چالان کی آڑ میں شہریوں کو شناختی کارڈ بلاک کی دھمکیاں کسی صورت قابل قبول نہیں۔

سندھ ہائیکورٹ میں دائر درخواست میں مزید کہا گیا کہ کراچی کے ساتھ مسلسل ہونے والی ناانصافی کے خلاف قانون کا دروازہ کھٹکھٹانے آئے ہیں،ہمارے سندھ کے حکمران دوسرے صوبوں سے مقابلہ کرنے نکلے تھے، چالانوں میں وہ مقابلہ کررہے ہیں۔

یہ بھی پڑھیں: گھریلو گیس کنکشن کیلئے ایک ماہ میں 3 لاکھ سے زائد درخواستیں

درخواست گزار نے کہا کہ لاہور میں چالان کا جرمانہ 200 روپے لیکن کراچی والوں کے لیے 5 ہزار روپے کیوں؟ کراچی پڑھے لکھے قانون کی حفاظت کرنے والوں لوگوں کا شہر ہے، کراچی پاکستان کو چلاتا ہے،ایک ملک میں دو قانون ظلم ہے۔

درخواست میں عدالت عالیہ سے استدعا کی گئی کہ ہائیکورٹ جلد درخواست کو سماعت کے لیے مقرر کرے۔