اسلام آباد ہائیکورٹ کو لکھے گئے خط میں وزیراعلیٰ خیبرپختونخوا سہیل آفریدی نے مؤقف اپنایا کہ اسلام آباد ہائی کورٹ نے وزیراعلیٰ کو بانی پی ٹی آئی عمران خان سے ملاقات کا حکم دیا تھا، جیل انتظامیہ نے وزیراعلیٰ کو ملنے کی اجازت نہیں دی۔
خط میں کہا گیا کہ اٹیسٹڈ کاپی کے حصول کے لیے درخواست پہلے ہی عدالت میں جمع کرائی جا چکی ہے، تاہم اب تک اٹیسٹڈ کاپی فراہم نہیں کی گئی، بانی سے ملاقات کے معاملے پر توہین عدالت کا کیس جمع کر انے کے لئے ہمیں حکم نامے کی اٹیسٹڈ کاپی فراہم کی جائے۔
وزیراعلیٰ خیبرپختونخوا سہیل آفریدی نے مزید کہا کہ قانون کی پاسداری کے لیے کیس کو آگے بڑھانے کی خاطر ہمیں عدالتی حکم نامے کی کاپی درکار ہے، آج کی تاریخ تک ہمیں حکم نامے کی کوئی کاپی تاحال موصول نہیں ہوئی۔
یہ بھی پڑھیں: سہیل آفریدی کا عمران خان سے ملاقات نہ ہونے پر عدالت سے رجوع کا فیصلہ
سہیل آفریدی نے ایڈووکیٹ جنرل خیبرپختونخوا کی وساطت سے خط اسلام آباد ہائی کورٹ کو ارسال کر دیا۔
یاد رہے کہ گزشتہ روز بھی وزیراعلیٰ خیبرپختونخوا سہیل آفریدی بانی پی ٹی آئی عمران خان سے ملاقات کی غرض سے اڈیالہ جیل پہنچے لیکن انہیں ملنے کی اجازت نہیں دی گئی جس پر انہوں نے توہین عدالت کی درخواست دائر کرنے کا عندیہ دیا تھا۔
