محکمہ موسمیات کے مطابق ملک کے بیشتر علاقے آئندہ 24 گھنٹوں تک خشک موسم کی لپیٹ میں رہیں گے، تاہم بالائی خیبر پختونخوا، گلگت بلتستان اور آزاد کشمیر کے کچھ حصوں میں مطلع جزوی ابرآلود رہے گا اور چند مقامات پر ہلکی بارش متوقع ہے۔
رپورٹس کے مطابق چترال، دیر، سوات، کوہستان، کرم اور مانسہرہ میں بارش کے امکانات ہیں جبکہ گلگت بلتستان کے بلند پہاڑی علاقوں میں ہلکی برفباری کا بھی امکان ہے۔ آزاد کشمیر میں مطلع جزوی ابرآلود اور موسم سرد رہنے کی پیشگوئی کی گئی ہے۔
دوسری جانب محکمہ موسمیات کی جانب سے خبردار کیا گیا کہ پنجاب کے مشرقی اضلاع اسموگ کے زیرِ اثر رہیں گے۔ لاہور، گوجرانوالہ، قصور، شیخوپورہ، اوکاڑہ، فیصل آباد، سیالکوٹ، خانیوال، رحیم یار خان، بہاولپور اور ملتان میں اسموگ برقرار رہنے کی توقع ہے۔
یہ بھی پڑھیں:پنجاب حکومت کا صاف پانی کے منصوبے کا آغاز
شہریوں کو احتیاطی تدابیر اختیار کرنے، غیر ضروری سفر سے گریز اور ماسک کے استعمال کی ہدایت کی گئی ہے۔
علاوہ ازیں اسلام آباد، مری، گلیات اور گردونواح میں موسم خشک اور سرد جبکہ سندھ اور بلوچستان کے بیشتر اضلاع میں بھی خشک اور خنک موسم برقرار رہے گا۔
واضح رہے کہ گزشتہ 24 گھنٹوں کے دوران ملک کے زیادہ تر حصوں میں موسم خشک جبکہ پہاڑی علاقوں میں سرد رہا، پنجاب کے مختلف شہروں میں اسموگ چھائی رہی جس کے باعث فضائی معیار مزید خراب ہونے کا خدشہ ظاہر کیا گیا ہے۔
