پاکستان کی مثبت حکومتی اور عسکری سفارتکاری نے خطے میں پاکستان کی اہمیت مزید بڑھا دی ہے جبکہ پہلگام فالس فلیگ کی آڑ میں بھارت کی پاکستان کو عالمی سطح پر تنہا کرنے کی کوشش ناکام ہو گئی۔
عالمی نشریاتی ادارے سی این این نے بھی پاک امریکا قریبی اور اسٹریٹجک تعلقات کا اعتراف کر لیا۔
سی این این پر جاری تجزیاتی رپورٹ میں تجزیہ کار فرید ذکریہ کا کہنا تھا کہ امریکی صدر ڈونلڈ ٹرمپ نے امریکا اور بھارت کے مابین پالیسی کا رخ اچانک بدل دیا، پہلے دورِ حکومت میں بھارتی وزیراعظم کے قریب سمجھے جانے والے ٹرمپ اب پاکستان کے فیلڈ مارشل سید عاصم منیر کے گرویدہ ہیں۔
یہ بھی پڑھیں: وزیراعلیٰ آفریدی کی بلٹ پروف گاڑیاں واپس کرنیکی ہدایت، وفاق کا سخت ردعمل
رپورٹ میں کہا گیا کہ مصر کانفرنس میں صدر ٹرمپ نے فیلڈ مارشل عاصم منیر کو اپنا "پسندیدہ فیلڈ مارشل" قرار دیا، امریکا اور پاکستان کے درمیان معاشی تعاون بھی بڑھ رہا ہے، جولائی میں امریکا اور پاکستان نے ٹیرف معاہدہ کیا اور پاکستانی تیل کے ذخائر پر مشترکہ تعاون کا اعلان کیا۔
تجزیاتی رپورٹ میں کہا گیا کہ امریکا نے یہ محسوس کیا ہے کہ پاکستان ایک مؤثر عسکری شراکت دار ہے، اسی عسکری صلاحیت نے سعودی عرب کو بھی متاثر کیا جس نے حال ہی میں پاکستان کے ساتھ دفاعی معاہدہ کیا، پاکستان کی سفارتی اور عسکری کامیابی نے پاکستان کی عالمی شناخت مستحکم کر دی ہے۔
