اسلام آباد کی انسداد دہشت گردی کے عدالت میں پی ٹی آئی رہنماؤں کے خلاف جوڈیشل کمپلیکس حملہ کی سماعت ہوئی، اے ٹی سی کے جج طاہر عباس سپرا نے ملزمان کے خلاف مقدمہ کی سماعت کی۔

عدالت کی جانب سے سابق سینیٹر شبلی فراز سمیت پاکستان تحریک انصاف کے دیگر رہنماؤں کے ناقابل ضمانت وارنٹ گرفتاری جاری کردیے، عدالت نے تحریک انصاف کے رہنماؤں کے تھانہ رمنا کے مقدمہ نمبر 153 میں وارنٹ گرفتاری جاری کیے ۔

مقدمہ میں پی ٹی آئی رہنما طاہر صادق اور علی نواز اعوان بھی نامزد ہیں، اے ٹی سی کی جانب سے پیٹرن انچیف پی ٹی آئی عمران خان کے حوالے سے وزارت داخلہ کو ایک بار پھر مراسلہ جاری کردیا گیا جبکہ عمران خان کے بھانجے حسان نیازی کے حوالے سے رپورٹ بھی طلب کی گئی ہے۔

یہ بھی پڑھیں: توشہ خانہ 2 کیس، عمران خان اور بشریٰ بی بی کیخلاف سماعت منسوخ

واضح رہے کہ عدالت پی ٹی آئی سینیٹر مراد سعید اور سابق وفاقی وزیر حماد اظہر کو مقدمے میں پہلے ہی اشتہاری قرار دے چکی ہے، مقدمہ میں نامزد ملزمان پر عمران خان کی انسداد دہشت گردی عدالت میں پیشی کے دوران توڑ پھوڑ کا الزام ہے۔

بعدازاں عدالت نے پی ٹی آئی رہنماؤں کے جوڈیشل کمپلیکس حملہ کیس کی مزید سماعت یکم نومبر تک ملتوی کر دی۔