رپورٹ کے مطابق پی پی رہنما سعید غنی سے محکمہ بلدیات کا قلمدان لے کر ناصر حسین شاہ کو تفویض دیا گیا جب کہ سعید غنی کو لیبر اینڈ سوشل پروٹیکشن وزارت سونپ دی گئی، ناصر حسین شاہ توانائی کے ساتھ اب وزیر بلدیات بھی ہوں گے۔
اسی طرح شاہد تھہیم سے وزیر محنت کا عہدہ واپس لے کر انہیں وزارت صحت کا قلمدان سونپا گیا ہے جب کہ جام خان شورو پر مزید بوجھ ڈال کر انہیں صوبائی پلاننگ اینڈ ڈویلپمنٹ (پی اینڈ ڈی) کا محکمہ بھی دے دیا گیا ہے۔
مخدوم محبوب کو امداد سے ہٹا کر محکمہ خوراک کا وزیر بنایا گیا ہے جب کہ مشیر جبار خان سے خوراک کا قلمدان واپس لے کر انہیں مشیر برائے امداد مقرر کر دیا گیا ہے۔
معاون خصوصی علی راشد کو محکمہ آئی ٹی کا قلمدان مل گیا ہے جبکہ اسماعیل راہو کو صوبائی وزیر بنا دیا گیا ہے اور انہیں محکمہ یونیورسٹیز اینڈ بورڈز کی ذمہ داری تفویض کی گئی ہے، شام سندر ادوانی کو بھی معاون خصوصی تعینات کر دیا گیا ہے۔
گورنر ہاؤس کراچی میں حلف برداری کی تقریب ہوئی، جہاں سندھ کے نئے وزرا نے اپنی وزارت کا حلف اٹھا یا ، گورنر سندھ کامران خان ٹیسوری نے نئے وزرا سے حلف لیا ، وزیر اعلیٰ سندھ سید مراد علی شاہ سمیت صوبائی وزرا اور دیگر مہمانوں نے حلف برداری کی تقریب میں شرکت کی۔
