راولپنڈی اڈیالہ میں سپیشل جج سینٹرل شاہ رخ ارجمند نے سابق وزیراعظم عمران خان اور ان کی اہلیہ بشریٰ بی بی کے خلاف توشہ خانہ ٹو کیس کی سماعت کی، بانی پی ٹی آئی عمران خان اور ان کی اہلیہ بشریٰ بی بی کو جیل سے کمرہ عدالت پیش کیا گیا۔
ملزمان کی جانب سے ایڈووکیٹ ارشد تبریز جبکہ ایف آئی اے کی جانب سے اسپیشل پبلک پراسیکیوٹر ذوالفقار عباس نقوی اور عمیر مجید ملک عدالت پیش ہوئے۔
سماعت کے دوران بانی پی ٹی آئی عمران خان اور ان کی اہلیہ بشری بی بی کا کوئی فیملی ممبر عدالت میں نہیں آیا، پی ٹی آئی کا کوئی رہنما بھی عدالت میں نہیں آیا۔
یہ بھی پڑھیں: حسان نیازی کی اعتراضی درخواست سماعت کیلئے مقرر کرنے کی ہدایت
دوران سماعت سابق خاتون اول بشریٰ بی بی کے وکیل ارشد تبریز نے استغاثہ کے 2 گواہان پر جرح مکمل کرلی، وکیل صفائی نے ایڈیشنل ڈائریکٹر نیب محسن ہارون اور ایڈیشنل ڈائریکٹر ایف آئی اے شاہد پرویز پر جرح کی ۔
بعدازاں عدالت نے عمران خان اور بشریٰ بی بی کے خلاف توشہ خانہ ٹو کیس کی مزید سماعت 29 ستمبر بروز پیر تک ملتوی کردی، بانی پی ٹی آئی عمران خان کے وکیل قوسین فیصل مفتی پیر کو دونوں گواہوں پر جرح کریں گے۔
واضح رہے کہ مقدمے میں مجموعی طور پر 20 گواہان کے بیان ریکارڈ اور 18 پر جرح مکمل کی جاچکی ہے ۔
