رپورٹس کے مطابق ان پر الزام ہے کہ وہ سوشل میڈیا پر اشتعال انگیز مہم چلا رہی تھیں اور ریاستی اداروں کے خلاف تضحیک آمیز مواد پھیلا رہی تھیں۔ اس حوالے سے ان کیخلاف الیکٹرانک کرائم ایکٹ کے تحت مقدمات درج کیے گئے ہیں۔

فلک جاوید گزشتہ 16 ماہ سے روپوش تھیں، ان کی گرفتاری کے بعد پاکستان تحریک انصاف (پی ٹی آئی) نے سوشل میڈیا پلیٹ فارم ایکس پر ان کی گرفتاری کی سخت مذمت کی ہے۔

پاکستان تحریک انصاف (پی ٹی آئی) رہنماؤں نے مؤقف اپنایا ہے کہ یہ اقدام سیاسی انتقام کی ایک کڑی ہے، فلک جاوید کو فوری طور پر رہا کیا جانا چاہیے۔

دوسری جانب فلک جاوید کے والد جاوید اقبال نے اسلام آباد ہائیکورٹ سے رجوع کیا ہے۔

ان کی جانب سے دائر کردہ درخواست میں استدعا کی گئی کہ فلک جاوید کو عدالت میں پیش کرنے کا حکم دیا جائے اور ان کیخلاف درج مقدمات کی تفصیلات فراہم کی جائیں۔

واضح رہے کہ گزشتہ سال پنجاب کی وزیر اطلاعات عظمیٰ بخاری نے بھی فلک جاوید کیخلاف لاہور ہائیکورٹ سے رجوع کیا تھا۔ انہوں نے موقف اپنایا کہ فلک جاوید نے سوشل میڈیا پر ان کی نازیبا ویڈیوز اپ لوڈ کی ہیں، وہ پہلے بھی مختلف ملک مخالف سرگرمیوں میں ملوث رہی ہیں۔

عظمیٰ بخاری نے عدالت سے استدعا کی تھی کہ فلک جاوید کا نام ایگزٹ کنٹرول لسٹ (ECL) میں شامل کیا جائے اور ایف آئی اے کو فوری تحقیقات کی ہدایت دی جائے۔