ڈپٹی کمشنر لاہور سید موسیٰ رضا کی جانب سے جاری نوٹیفکیشن میں کہا گیا کہ لاہور کے سکولوں میں کل یکم ستمبر سے تعلیمی سرگرمیوں کا آغاز ہو گا تاہم سیلاب سے متاثرہ علاقوں میں موجود 45 سرکاری سکول بند رہیں گے۔
نوٹیفکیشن میں بتایا گیا کہ سیلاب سے متاثرہ علاقوں میں ریلیف کیمپس قائم کیے جانے کے باعث لاہور کے 45 سکولوں میں تعلیمی سرگرمیوں کا آغاز صورتحال بہتر ہونے پر کیا جائے گا۔
ڈی سی لاہور کی جانب سے جاری کردہ نوٹیفکیشن کے مطابق لاہور کےعلاقوں مانگا منڈی، چوہنگ، سگیاں کے سرکاری سکولز بند رہیں گے، شاہدرہ، بند روڈ، ٹھوکر نیاز بیگ ، شاہ پور کانجراں، رنگیل پور اور موہلنوال کے سکول یکم ستمبر کو بند رہیں گے۔
نوٹیفکیشن میں ہدایت کی گئی ہے کہ مذکورہ علاقوں میں والدین اور طلباء سکولوں کی انتظامیہ سے رابطے میں رہیں۔
یہ بھی پڑھیں: سیلاب سے متاثرہ علاقوں کے سکول غیر معینہ مدت کیلئے بند
دوسری جانب لاہور ڈویژن میں سیلابی صورتحال کے باعث پنجاب یونیورسٹی میں بھی کلاسز کا آغاز ایک ہفتے کے لیے مؤخر کر دیا گیا ہے۔
رجسٹرار جامعہ پنجاب کی جانب سے جاری کردہ نوٹیفکیشن میں کہا گیا ہے کہ موسم گرما کی تعطیلات کے بعد کلاسز کا آغاز ایک ہفتے کے لیے ملتوی کیا گیا ہے، پنجاب یونیورسٹی میں یکم تا 7 ستمبر زیرو ویک ہو گا، تاہم ہاسٹلز کی الاٹمنٹ کا سلسلہ جاری رہے گا۔
ترجمان پنجاب یونیورسٹی کی جانب سے مزید کہا گیا کہ جامعہ پنجاب میں کلاسز کا آغاز 8 ستمبر بروز منگل سے ہو گا۔
