این ڈی ایم اے نے ملک کے بالائی و وسطی علاقوں میں 5 تا 10 اگست شدید بارشوں کے باعث ممکنہ سیلابی صورتحال کا الرٹ جاری کردیا۔

رپورٹ کے مطابق دریائے چناب (مرالہ، کھنکی، قادرآباد) اور دریائے جہلم (منگلا کے بالائی علاقوں) میں درمیانے سے اونچے درجے کے سیلاب کا خدشہ ہے، دریائے کابل میں نوشہرہ کے مقام پر پانی کا بہاؤ تیزہونے کا امکان ہے جبکہ سوات و پنجکوڑہ کے ندی نالوں میں طغیانی کا اندیشہ ہے۔

این ڈی ایم اے کی جانب سے کہا گیا ہے کہ شدید بارشوں کے باعث تربیلا، کالا باغ، چشمہ، تونسہ اور گڈو بیراج میں نچلے درجے کا بہاؤ موجودہے تاہم آئندہ دنوں میں درمیانے درجے تک پہنچنے کا امکان ہے، گلگت بلتستان میں دریائے ہنزہ اور شگر کا بہاؤ بڑھنے کا خدشہ، ہسپر، خنجراب، شمشال، برالدو، ہوشے اور سالتورو کے ندی نالوں میں طغیانی متوقع ہے۔

رپورٹ میں بتایا گیا ہے کہ بلوچستان کے اضلاع موسیٰ خیل، شیرانی، ژوب اور سبی کے ندی نالوں میں طغیانی کا امکان ہے، مون سون بارشوں کے نتیجے میں تربیلا ڈیم 90 فیصد جبکہ منگلا ڈیم 60 فیصد بھر چکا ہے۔

یہ بھی پڑھیں: مون سون کا چھٹا طاقتور اسپیل، پی ڈی ایم اے کا الرٹ جاری

این ڈی ایم اے کی جانب سے ہدایت کی گئی ہے کہ شہری علاقوں، خصوصاً شمال مشرقی و وسطی پنجاب میں نکاسی آب کے لیے متعلقہ ادارے ڈی واٹرنگ پمپس تیار رکھیں، لینڈ سلایڈنگ اور ممکنہ سیلابی صورتحال کے حوالے سے حساس علاقوں میں غیر ضروری سفر سے گریز کریں۔

رپورٹ میں کہا گیا ہے کہ تیز بہاؤ کی صورت میں ندی نالوں، پلوں اور پانی میں ڈوبی سڑکوں سے گزرنے سے گریزکریں، مقامی انتظامیہ اور متعلقہ ادارے نشیبی علاقوں سے فوری نکاسی آب کے لیے ضروری مشینری اور پمپس تیار رکھیں۔

این ڈی ایم اے کی جانب سے تمام متعلقہ اداروں کو ممکنہ خطرات سے نمٹنے کے لیے پیشگی اقدامات اور تیاری کی ہدایت کی گئی ہے جبکہ عوام سے گزارش کی گئی ہے کہ موسم اور ممکنہ خطرات کے حوالے سے آگاہی کے لیے پاک این ڈی ایم اے ڈیزاسٹر الرٹ ایپ سے راہنمائی لیں۔