ترجمان وزارت مذہبی امور نے بتایا کہ پہلے آئیے پہلے پائیے کی بنیاد پر رجسٹرڈ افراد سے حج واجبات کی پہلی قسط 4 تا 9 اگست وصول کی جائے گی، نامزد بینکوں اور آن لائن پورٹل کے ذریعے حج درخواستیں جمع کروانے کی سہولت ہے۔

ان کا کہنا تھا کہ نشستیں دستیاب ہونے پر 11 تا 16 اگست نئے عازمین حج بھی اپلائی کر سکیں گے، نشستیں مکمل ہوتے ہی حج واجبات کی وصولی روک دی جائے گی، حج واجبات کی دوسری قسط یکم نومبر سے وصول کی جائے گی۔

ترجمان کے مطابق حج پیکیج 2026 ساڑھے گیارہ سے ساڑھے بارہ لاکھ روپے کے درمیان ہو گا، حج کی قربانی (دم شکر) واجبات میں شامل ہے۔

یہ بھی پڑھیں: حج 2026، غیررجسٹرڈ افراد کیلئے بھی دروازے کھل گئے

وزارت مذہبی امور کے ترجمان نے مزید بتایا کہ دوبارہ حج کرنے اور عمر کی بالائی حد کی پابندی ختم کردی گئی ہے، یکم مارچ 2014 کے بعد پیدا ہونے والے بچے اپلائی نہیں کر سکتے۔

علاوہ ازیں حکومتِ پاکستان نے غیررجسٹرڈ عازمین حج سے بھی درخواستیں وصول کرنے کا فیصلہ کیا ہے، یہ فیصلہ ممکنہ طور پر کوٹہ مکمل نہ ہونے کے خدشے کے پیش نظر کیا گیا ہے۔

عازمین کو مشورہ دیا گیا ہے کہ وہ مقررہ تاریخوں کے اندر ہی درخواستیں جمع کرا کر اس موقع سے بھرپور فائدہ اٹھائیں۔