تفصیلات کے مطابق اس اسکیم کا مقصد ایندھن پر انحصار کم کرنا، ماحولیاتی تبدیلی سے نمٹنا، اور عوام بالخصوص طلبہ، کم آمدنی والے افراد، اور ڈیلیوری رائیڈرز  کو کم خرچ اور ماحول دوست سفری سہولیات فراہم کرنا ہے۔

حکومت نے مالی سال 2025 کے بجٹ میں اس اسکیم کے لیے 9 ارب روپے مختص کیے ہیں۔ ہر الیکٹرک بائیک پر حکومت کی جانب سے براہِ راست 65,000 روپے کی سبسڈی دی جائے گی جبکہ باقی قیمت بغیر سود کے آسان ماہانہ اقساط میں بینک کے ذریعے ادا کی جائے گی تاکہ وہ افراد بھی بائیک حاصل کر سکیں جو فوری طور پر مکمل رقم ادا نہیں کر سکتے۔

اسکیم کے لیے درخواستیں ایک مخصوص آن لائن پورٹل کے ذریعے وصول کی جائیں گی جسے شفافیت اور آسانی کو مدنظر رکھتے ہوئے تیار کیا جا رہا ہے۔ اگر درخواستوں کی تعداد مقررہ بائیکس سے زیادہ ہوئی تو قرعہ اندازی کے ذریعے امیدوار منتخب کیے جائیں گے۔

یہ اسکیم پاکستان کے الیکٹرک وہیکل روڈ میپ کا حصہ ہے جس کا مقصد 2030 تک 20 لاکھ الیکٹرک بائیکس سڑکوں پر لانا ہے۔ اس کے علاوہ حکومت الیکٹرک رکشے، کاریں، بسیں، اور ٹرک بھی متعارف کرانے کا منصوبہ رکھتی ہے۔ تاکہ ٹرانسپورٹ کے شعبے کو جدید بنایا جا سکے اور فضائی آلودگی میں کمی لائی جا سکے۔

وزیراعظم شہباز الیکٹرک بائیک اسکیم 2025 کے لیے درج ذیل افراد درخواست دے سکتے ہیں:

• عمر 18 سے 65 سال کے درمیان ہو
• پاکستانی شہری ہوں اور درست کمپیوٹرائزڈ قومی شناختی کارڈ (CNIC) رکھتے ہوں
• اگر امیدوار طالب علم ہے تو وہ ہائر ایجوکیشن کمیشن (HEC) سے منظور شدہ کسی ڈگری کالج یا یونیورسٹی کا باقاعدہ طالب علم ہو
• امیدوار کے پاس موٹر سائیکل لرنر پرمٹ یا ڈرائیونگ لائسنس ہونا ضروری ہے
• اگر درخواست دہندگان کی تعداد مختص بائیکس سے زیادہ ہو تو الیکٹرانک قرعہ اندازی (e-balloting) کی جائے گی    

یہ بھی پڑھیں: شناختی کارڈ میں تجدید کا آسان طریقہ جانیے

درخواست دینے کا طریقہ:

1. سرکاری EV اسکیم پورٹل پر جائیں

• یومِ آزادی کے دن حکومت ایک سرکاری آن لائن پورٹل کا آغاز کرے گی
• لنک وزیراعظم یا وزارتِ صنعت و پیداوار کی جانب سے جاری کیا جائے گا

2.   CNIC  کے ذریعے رجسٹریشن کریں

• اپنا درست شناختی کارڈ نمبر درج کریں
• ذاتی معلومات فراہم کریں: نام، عمر، پتہ، موبائل نمبر، ای میل وغیرہ

3.  بائیک کا ماڈل منتخب کریں

• حکومت سے منظور شدہ کمپنیوں میں سے الیکٹرک بائیک کا ماڈل منتخب کریں

4.  مطلوبہ دستاویزات اپلوڈ کریں:

• CNIC کی کاپی
• حالیہ تصویر
• آمدنی کا ثبوت (اگر ضروری ہو)
• طالب علم یا ملازم ہونے کا ثبوت (اگر لاگو ہو)

5. قسط کا منصوبہ منتخب کریں

• اپنی سہولت کے مطابق قسط کا پلان منتخب کریں (عام طور پر 24 ماہ کا ہوگا)

6.  درخواست جمع کروائیں

• “Submit” پر کلک کریں اور تصدیق کا انتظار کریں

7. منظوری اور اطلاع

• منظور ہونے کے بعد SMS یا ای میل کے ذریعے اطلاع دی جائے گی

8. بائیک کی ترسیل

• بینک کی حتمی منظوری کے بعد بائیک مجاز ڈیلرشپ کے ذریعے فراہم کی جائے گی

واضح رہے کہ الیکٹرک بائیک اسکیم 2025 حکومتِ پاکستان کے EV روڈ میپ کا اہم جز ہے جس کے تحت 2030 تک درج ذیل الیکٹرک گاڑیاں متعارف کرائی جائیں گی:

• 53,950 الیکٹرک رکشے
• 99,155 الیکٹرک کاریں
• 2,238 الیکٹرک بسیں
• 2,996 الیکٹرک ٹرک

یہ سب اقدامات پاکستان کے ماحولیاتی مستقبل کو بہتر بنانے، شہریوں کے لیے سستی سفری سہولتیں فراہم کرنے اور ٹرانسپورٹ کے نظام کو جدید بنانے کی طرف ایک عملی قدم ہیں۔