وزیر مذہبی امور سردار محمد یوسف نے کوہسار بلاک میں حج پالیسی سے متعلق پریس کانفرنس کرتے ہوئے کہا کہ وفاقی کابینہ نے آئندہ سال کے لیے حج پالیسی کی منظوری دے دی ہے، حکومت نے حج 2026 کے کوٹے کو ایک لاکھ 95 ہزار سے بڑھا کر 2 لاکھ 55 ہزار کرنے کا فیصلہ کیا ہے۔

انہوں نے بتایا کہ سعودی حکومت کو پاکستان نے حج کوٹے میں اضافے کے لیے باضابطہ درخواست دی ہے، روڈ ٹو مکہ  پروگرام کے تحت امیگریشن سہولت کراچی، لاہور سمیت مزید شہروں میں شروع کی جارہی ہے۔

وفاقی وزیر کا کہنا تھا کہ حج درخواستیں موصول ہونے کی تعداد 4 لاکھ 55 ہزار سے تجاوز کر گئی ہے جو کوٹے سے کئی گنا زیادہ ہے، نجی ٹوور آپریٹرز کے لیے حج 2026 میں2 ہزار عازمین کے کوٹے والی شرائط برقرار رہیں گی۔

یہ بھی پڑھیں: وفاقی کابینہ کا اجلاس، حج 2026 کیلئے نئی پالیسی کی منظوری

سردار محمد یوسف نے کہا کہ وزیراعظم نے نجی کوٹا میں شفافیت یقینی بنانے کی ہدایت کی ہے، نوجوانوں اور پہلی بار حج کرنے والوں کو ترجیح دی جائے گی، گرمی سے بچاؤ کے لیے منیٰ کے خیموں میں پہلی بار اے سی اور ایئر کولر فراہم کیے جائیں گے۔

وفاقی وزیر مذہبی امور کا کہنا تھا کہ ہر 188 عازمین کے لیے ایک ناظم جبکہ 1050 معاونین کو دستیاب کرانا طے شدہ ہے،حج کے لیے عمر کی بنیاد پر پابندی برقرار ہے، 12 سال سے کم عمر بچوں کے حج ویزا کی اجازت نہیں، ہم سعودی پالیسی کے تابع ہیں۔

انہوں نے کہا کہ مدینہ اور مکہ میں بہترین سہولیات کی وجہ سے رواں برس مجموعی شکایات میں 72 فیصد کمی آئی ہے ،مختصر حج اسکیم کے تحت 20-25 دن کی زیارت کا آپشن بڑھا ہے۔