وزیراعظم آفس کی جانب سے جاری ایک بیان کے مطابق وزیرِ اعظم محمد شہباز شریف کی زیرِ صدارت وفاقی کابینہ کا اجلاس منعقد ہوا جس میں حج پالیسی 2026 اور مصنوعی ذہانت پالیسی 2025 کی منظوری دی گئی۔
دوران اجلاس وزیراعظم کو بریفنگ میں بتایا گیا کہ آئندہ برس پاکستان کا مجموعی ملکی حج کوٹا 70 فیصد حکومتی اور 30 فیصد نجی کوٹے کے تناسب سے تقسیم کیا جائے گا، گزشتہ برس نجی شعبے کی غفلت کی وجہ سے حج سے محروم رہ جانے والے افراد کا حج نجی کمپنیاں 2026 میں یقینی بنائیں گی۔
بریفنگ میں بتایا گیا کہ نئی پالیسی کے تحت سرکاری اسکیم و نجی کمپنیوں کے تحت حج آپریشن کی تھرڈ پارٹی ویلیڈیشن یقینی بنائی جائے گی، پالیسی میں حج کے دوران حاجیوں کی سہولیات کے ساتھ ساتھ انہیں ان کی رقوم کے متوازی سروسز فراہم کرنا شامل ہے، پالیسی میں آئندہ برس ایک ہزار نشستیں ہارڈ شپ کیسز کے تحت مختص کی گئی ہیں۔
وزیراعظم کو بتایا گیا کہ پالیسی کے تحت کسے بھی نجی کمپنی کے لیے حاجیوں کی کم از کم تعداد 2 ہزار رکھی گئی ہے،نجی کمپنیوں کی حج آپریشن کے دوران کڑی نگرانی کی جائے گی ، پالیسی کے اطلاق کے بعد نجی کمپنیوں کے تحت درخواست گزاروں کی رقوم و پراسیس کی ریئل ٹائم مانیٹرنگ یقینی بنائی جائے گی۔
یہ بھی پڑھیں: حج 2026، رجسٹریشن کی مدت میں 2 دن کی توسیع
حکام نے بتایا کہ حج 2026 کیلئے گزشتہ برس کی طرح معاونین کا انتخاب شفاف انداز سے ٹیسٹ کے ذریعے ہوگا، حجاج کیلئے موبائل سمز، ڈیجیٹل رسٹ بینڈز، بہترین قیام و طعام اور کسی بھی ہنگامی و حادثاتی صورتحال کے نتیجے میں معاوضے کو یقینی بنایا جائے گا، ادائیگیوں، تربیت، شکایات و دیگر سروسز کیلئے پاک حج موبائل ایپلی کیشن کو مزید مؤثر بنایا جا رہا ہے۔
وفاقی کابینہ نے حج پالیسی 2026 کی متفقہ طور پر منظوری دے دی، کابینہ ارکان نے تمام متعلقہ وزارتوں اور اداروں سمیت پالیسی کی تشکیل میں کردار ادا کرنے والے افسران و اہلکاروں کی کوششوں کو سراہا۔
وزیرِ اعظم نے وزیرِ انفارمیشن ٹیکنالوجی کو وزارت مذہبی امور کے ساتھ مل کر حج آپریشن کی مکمل ڈیجیٹائزیشن کو یقینی بنانے کی بھی ہدایت کی۔
اس موقع پر وزیراعظم شہباز شریف کا کہنا تھا کہ حجاج کرام کو بہترین سہولیات کی فراہمی کیلئے آئندہ برس حج آپریشن کی مکمل ڈیجیٹائزیشن خوش آئند ہے، حجاج کرام کو ہر قسم کی سہولیات کی فراہمی یقینی بنائی جائے گی، وزارت مذہبی امور حج پالیسی پر عملدرآمد یقینی بنائے گی۔
