نورین نیازی اور عظمیٰ خان کی عمران خان سے ملاقات کے بعد اڈیالہ جیل کے باہر میڈیا سے گفتگو میں علیمہ خان کا مزید کہنا تھا کہ کچھ بھی ہو عمران خان کا پیغام عوام تک ضرور پہنچائیں گے، ہمارے بھی ذرائع ہیں جو ہمیں خبریں دیتے ہیں، بانی نے کہا ہے ایک ہفتے سے انکا ٹی وی، اخبار اور کتابیں بند کردی گئی ہیں، بشریٰ بی بی کو بھی قید تنہائی میں رکھا گیا ،ہماری فیملیاں احتجاجی تحریک میں پوری طرح شامل ہونگی۔

قبل ازیں بانی سے ملاقات کرکے عظمیٰ خان کے ہمراہ جیل سے واپس آنے پر نورین نیازی نے مختصر میڈیا گفتگو میں کہا بانی خیریت سے ہیں، انکے ساتھ وہ ہو رہا ہے جو کسی قیدی سے نہیں ہوتا۔

یہ بھی پڑھیں: قوم کو جمہوریت بچانے، 26ویں ترمیم کیخلاف نکلنا ہو گا: عمران خان

چیئرمین تحریک انصاف بیرسٹر گوہر نے بھی عمران خان سے ملاقات کی اور وزیراعظم کی مذاکرات کی پیشکش سے متعلق بتایا، عمران خان نے کوئی حتمی جواب نہ دیا۔ ذرائع نے یہ بتایا بیرسٹر گوہر نے بانی کو پارٹی امور اور اسیر قیادت کے خط بارے آگاہ کیا، بیرسٹر گوہر نے بانی کو بتایا موجودہ حالات میں قیادت بارے سخت پیغامات مناسب نہیں، 26 ویں آئینی ترمیم کے بعد عدلیہ کی پوزیشن سے بھی آگاہ کیا اور کہا احتجاج اور عدلیہ کے علاوہ بھی دستیاب آپشنز پر غور کرنا چاہیے۔

قبل ازیں میڈیا سے گفتگو میں بیرسٹر گوہر کا کہنا تھا کہ کوشش ہے مذاکرات کا سلسلہ آگے بڑھے جن سے بات ہونی چاہئے کوشش ہے انہی سے ہو، فی الوقت ہمارا کسی قسم کا کوئی بیک ڈور ڈائیلاگ نہیں چل رہا۔