پاکستان پیپلزپارٹی کی مرکزی ترجمان شازیہ مری نے صدر مملکت آصف علی زرداری کے استعفیٰ کی زیر گردش خبروں پر ردعمل میں کہا کہ صدر زرداری کے استعفیٰ کی افواہیں من گھڑت اور جھوٹ پر مبنی ہیں۔

شازیہ مری کا کہنا تھا کہ پاکستان پیپلز پارٹی اور صدر مملکت آصف علی زرداری نے ثابت کیا ہے کہ ہم کبھی میدان نہیں چھوڑتے، تاریخ گواہ ہے کہ صدر مملکت آصف زرداری نے آمریت اور قید کا سامنا کیا لیکن پیچھے نہیں ہٹے۔

ترجمان پیپلزپارٹی نے کہا کہ ہمارے اتحادیوں سے اچھے تعلقات ہیں اور 4 صوبائی اسمبلیوں، قومی اسمبلی اور سینیٹ میں دو تہائی اکثریت درکار ہے، اس لیے ایسے کسی سوال کا کوئی جواز نہیں،صدر زرداری وہ واحد سیاستدان ہیں جنہوں نے صدارتی اختیارات پارلیمان کو دئیے۔

ان کا کہنا تھا کہ صدر مملکت آصف علی زرداری کی سیاسی بصیرت کی بدولت چاروں اکائیوں کو صوبائی خودمختاری ملی، جب ملک مشکلات میں آیا تو صدر زرداری ہی تھے جنہوں نے پاکستان کھپے کا نعرہ لگایا۔

شازیہ مری نے مزید کہا کہ حقوق بلوچستان ہو یا سوات میں امن و امان کا قیام صدر زرداری کی بدولت ہی ممکن ہوا، صدر مملکت آصف علی زرداری ملک کے پہلے سویلین صدر ہوں گے جو اپنی دو صدارتی مدتیں مکمل کریں گے۔

یاد رہے کہ اس سے قبل حکومتی جماعت کے سینئر رہنما عرفان صدیقی نے بھی صدر زرداری کو عہدے سے ہٹانے کی خبروں کی تردید کرتے ہوئے کہا تھا کہ صدر آصف زرداری کی تبدیلی کی کوئی تجویز کسی سطح پر زیر غور نہیں، صدر زرداری ریاست کے آئینی سربراہ کے طور پر بہترین کردار ادا کر رہے ہیں۔