ذرائع کے مطابق کراچی کا رہائشی ننھا عثمان عقیل کالسی فیلیائسز (Calciphylaxis) کے مہلک مرض میں مبتلا ہے، ننھے معصوم نے پاک فوج میں بطور افسر ایک دن گزارنے کی درخواست کی تھی۔

کور کمانڈر کراچی لیفٹیننٹ جنرل اویس دستگیر نے ننھے عثمان عقیل کی خواہش کو پورا کرتے ہوئے اسے کور ہیڈکوارٹرز کراچی میں مدعو کیا، کور کمانڈر نے بچے کے جذبے کو سراہا اور اس کو خراج تحسین پیش کیا۔

بچے نے والدہ کے ہاتھوں کیپٹن کے عہدے کے رینک لگوائے اور پاک فوج کے ساتھ پورا دن گزارا، ننھے عثمان عقیل کو پاک فوج کے زیر استعمال مختلف ہتھیاروں کا فائر کروایا گیا ، عثمان عقیل کو پاک فوج کی ٹریننگ اور آپریشنز کے طریقہ کار سے بھی آگاہی دی گئی۔

اس موقع پر گفتگو کرتے ہوئے ننھے عثمان عقیل کا کہنا تھا کہ آج پاک فوج میں شامل ہونے کی میری خواہش پوری ہو گئی، میں کور کمانڈر کراچی کا شکر گزار ہوں جنہوں نے مجھے یہ موقع فراہم کیا۔

عثمان عقیل کا مزید کہنا تھا کہ پاک فوج نے جس طرح آپریشن بنیان مرصوص میں بھارت کو دھول چٹائی اس کی مثال نہیں ملتی، پاکستان کا بچہ بچہ اپنی پاک افواج کے شانہ بشانہ کھڑا ہے اور ہر دم دشمن سے مقابلے کیلئے تیار ہے۔