معاون خصوصی برائے ہاؤسنگ ڈاکٹر امجد علی نے کہا کہ فی کس 15 لاکھ روپے بلاسود قرضہ دے رہے ہیں، قرضہ ان لوگوں کو دیا جائے گا جن کی ماہانہ آمدن ایک لاکھ سے کم ہے اور قرض کی واپسی کی مدت 7 سال ہے جب کہ ماہانہ 18 ہزار روپے ہوگی۔

ڈاکٹر امجد علی کے مطابق قرض ان لوگوں کے لیے ہے جن کے پاس 5 مرلے یا اس سے کم کا پلاٹ یا گھرہو جب کہ قرض کے لیے عمر کی حد 18 سے 55 سال ہے، اسکیم کا مقصد صوبے کے غریب اور نچلے متوسط طبقے کو بلاسود اور شریعت کے مطابق قرضے فراہم کرنا ہے، تاکہ وہ اپنا ذاتی گھر تعمیر کر سکیں مرمت کرا سکیں یا بہتری لا سکیں۔

انہوں نے کہا کہ اس منصوبے کو صوبائی ترقیاتی پروگرام کے تحت شامل کیا گیا ہے۔ سکیم کے تحت ابتدائی طور پر 5 ہزار 309 گھروں کی تعمیر کی جائے گی جن پر 4ارب روپے لاگت آئے گی، احساس اپنا گھر منصوبے کو اگلے سات سالوں میں 11 ہزار 196 گھروں تک وسعت دی جائے گی اور مجموعی لاگت 8ارب 95کروڑ 70لاکھ تک پہنچے گی۔

ان کا کہنا تھا کہ درخواست گزار کیلئے کچھ بنیادی شرائط بھی رکھی گئی ہیں۔ درخواست دہندہ کا خیبرپختونخوا کا رہائشی ہونا، عمر 20 سے 50 سال کے درمیان، ماہانہ آمدنی 1 لاکھ 50 ہزار روپے سے کم ہونا ضروری ہے، ساتھ ہی درخواست گزار کے پاس شناختی کارڈ، فعال بینک اکائونٹ، پختونخوا ہائوسنگ اتھارٹی کا بیلٹنگ سرٹیفکیٹ یا زمین کی ملکیت کا ثبوت ہونا لازمی ہے۔

ڈاکٹرا مجد علی کے مطابق منصوبے کیلئے بینک آف خیبر کو سروس فراہم کنندہ ادارہ مقرر کیا گیا ہے، جس کیلئے 13 دسمبر 2024 کو باقاعدہ معاہدہ ہوا منصوبے کی 24 اکتوبر کو کابینہ کے اجلاس میں منصوبے کی منظوری دی گئی اور پی سی ون کو 4 ارب روپے کی لاگت سے منظور کر لیا گیا جس کے بعد اب محکمہ ترقی و منصوبہ بندی نے بھی اس کی منظوری دیدی ہے۔