محکمہ داخلہ پنجاب نےعارضی نصب ہونیوالے مکینیکل جھولوں پر پابندی سے متعلق تمام ڈپٹی کمشنرز کو مراسلہ جاری کردیا۔
مراسلے میں کہا گیا ہے کہ عید کے دوران تفریحی پارکوں میں بچوں سمیت لوگوں کی بڑی تعداد کی آمد متوقع ہے،شہری کھیل کے میدانوں، گیمنگ زونز اور مکینیکل جھولوں سے لطف اندوز ہونے کیلئے ان مقامات کا رخ کریں گے۔
ڈپٹی کمشنرز کے نام جاری مراسلے میں کہا گیا کہ تفریحی پارکس، تھیم پارکس، پلے ایریاز میں مستقل بنیادوں پر لگائے گئے مکینیکل جھولوں کی مشروط اجازت ہو گی،مستقل بنیادوں پر لگائے گئے جھولوں کیلئے فٹنس سرٹیفکیٹ کا حصول لازم ہو گا۔
مراسلہ میں مزید کہا گیا کہ مستقل نصب جھولوں کے حفاظتی معائنے اور تمام ریگولیٹری معیارات پر عملدرآمد بارے متعلقہ ڈپٹی کمشنر سے تصدیقی سرٹیفکیٹ لازم ہے جبکہ عارضی نصب ہونے والے مکینیکل جھولوں پر پابندی کا فیصلہ انسانی جانوں کے تحفظ کیلئے کیا گیا ہے،پابندی کا اطلاق پنجاب بھر میں ہوگا۔
علاوہ ازیں محکمہ داخلہ پنجاب میں مرکزی کنٹرول روم بھی قائم کر دیا گیا،کنٹرول روم 24 گھنٹے پنجاب بھر سے رپورٹس مرتب کریگا۔
ترجمان محکمہ داخلہ پنجاب کی جانب سے کہا گیا ہے کہ امن و امان کا قیام اور حکومتی احکامات پر عملدرآمد یقینی بنایا جائے گا،سینئر افسران کی قیادت میں عید کی چھٹیوں میں کام جاری رہے گا۔
