محکمہ موسمیات کے مطابق ملک کے بیشتر علاقوں میں موسم خشک اور مطلع جزوی ابر آلود رہنے کی توقع ہے، تاہم اسلام آباد اور گرد و نواح میں تیز ہواؤں کے ساتھ گرج چمک اور بارش کا امکان ظاہر کیا گیا ہے۔
محکمہ موسمیات کا کہنا ہے کہ اسلام آباد میں موسم جزوی طور پر ابر آلود رہے گا، اور بارش کے ساتھ تیز ہوائیں بھی چل سکتی ہیں۔
بلوچستان کے بیشتر اضلاع میں موسم خشک رہنے کی پیشگوئی کی گئی ہے، تاہم شمالی بلوچستان میں مطلع جزوی ابر آلود رہ سکتا ہے۔ سندھ میں بھی موسم خشک رہنے کا امکان ہے، تاہم زیریں سندھ کے بعض علاقوں میں گرم رہنے کا امکان ہے۔
علاوہ ازیں راولپنڈی، اٹک، جہلم، چکوال، منڈی بہاؤالدین، سرگودھا، میانوالی، خوشاب، گجرات، سیالکوٹ، نارووال، لاہور، گوجرانوالہ، فیصل آباد اور شیخوپورہ میں بھی کچھ مقامات پر تیز ہواؤں اور گرج چمک کے ساتھ بارش کی توقع کی جارہی ہے۔ مری، گلیات اور گرد و نواح میں بھی بارش کی توقع ہے۔
خیبر پختونخواہ کے مختلف علاقوں میں تیز ہواؤں کے ساتھ گرج چمک کی بارش ہونے کی پیشگوئی کی گئی ہے، خصوصاً چترال، دیر، سوات، کوہستان، شانگلہ، بٹگرام، مانسہرہ، ایبٹ آباد، نوشہرہ، صوابی، مردان، پشاور، کوہاٹ، کرک، بنوں، باجوڑ، مہمند، کرم، خیبر اور وزیرستان میں بارش کی شدت زیادہ ہو سکتی ہے۔
کشمیر اور گلگت بلتستان میں بھی مطلع ابر آلود رہے گا اور پہاڑوں پر برفباری کی توقع ہے۔
