حافظ نعیم الرحمن نے پشاور پریس کلب میں میٹ دی پریس پروگرام سے خطاب کرتے ہوئے کہا کہ حکمران اتنے گرچکے، آئی ایم ایف کو اعلیٰ عدالت تک بھی پہنچ فراہم کر دی، قوم کی خود مختاری اور آزادی کا اس سے بڑھ کر کیا سودا ہوگا ؟ ملک کا المیہ ہے کہ یہاں سیاست، عدالت اور صحافت پر مکمل کنٹرول قائم ہوچکا ہے، مرضی کے نتائج کیلئے طاقت کا استعمال ہوتا ہے۔

انہوں نے کہا پیکا قانون آزادی اظہار رائے پر حملہ، اسے ختم کیا جائے، صحافیوں کی جدوجہد کے ساتھ ہیں۔کرم میں سکیورٹی اہلکاروں کی شہادت پر افسوس ہے، افغان سر زمین کسی صورت پاکستان میں دہشتگردی کیلئے استعمال نہیں ہونی چاہیے ۔ ٹرمپ رئیل سٹیٹ ایجنٹس کی طرح بیانات داغ رہے ہیں، آئندہ دنوں میں اسرائیل کو تسلیم کرنے سے متعلق پاکستان پر دباؤ بڑھے گا، حکمران ایسا کرنے کی جرات نہ کریں۔ حکمران مہنگائی میں کمی سے متعلق مسلسل جھوٹ بول رہے ہیں، پاک افغان مذاکرات اور امن کیلئے کردار ادا کرنے کو تیار ہیں۔