تفصیلات کے مطابق اسلام آباد میں سپریم کورٹ میں حلف برداری کی تقریب کے دوران جسٹس منصور علی شاہ نے صحافیوں سے غیر رسمی گفتگو کی۔
اس موقع پر صحافی نے سپریم کورٹ آف پاکستان کے سینئر جج جسٹس منصور علی شاہ سے سوال کیا گیا کہ کہا جاتا ہے کہ آپ لوگ کام نہیں کرتے ہیں؟
سوال کا جواب دیتے ہوئے جسٹس منصور علی شاہ نے کہا کہ مقدمات نمٹانے کی شرح دیکھ لیں، کس کے کتنے فیصلے قانون کی کتابوں میں شائع ہوئے سب سامنے ہے۔
انہوں نے مزید کہا کہ تمام ریکارڈ سپریم کورٹ آف پاکستان کی ویب سائٹ پر موجود ہے، ابھی توحلف برداری کے بعد چائے پینے کیلئے آیا ہوں۔
صحافی نے جسٹس منصور علی شاہ سے ایک اور سوال پوچھتے ہوئے کہا کہ سنا ہے آپ کیخلاف ریفرنس آ رہا ہے؟
اس پر جسٹس منصور علی شاہ نے جواب دیتے ہوئے کہا کہ ریفرنس جب آئے گا تب دیکھا جائے گا، کچھ غلط کیا ہی نہیں تو ریفرنس کا ڈر کیوں ہو، ہمارا اللّٰہ مالک ہے۔
سینئر جج جسٹس منصور علی شاہ نے کہا کہ کسی سے کوئی ذاتی عناد یا اختلاف تو ہے نہیں، کمرے میں موجود ہاتھی کسی کو نظر نہ آئے تو کیا کہہ سکتے ہیں۔
